తాప్సీ 'దో బారా' ట్రైలర్: టైమ్ ట్రావెల్ కాన్సెప్ట్ తో కూడిన మర్డర్ మిస్టరీ..!

తెలుగు సినిమాలో హీరోయిన్‌ గా కెరీర్‌ ప్రారంభించిన ఢిల్లీ భామ తాప్సీ పన్నూ.. ఇప్పుడు బాలీవుడ్‌ లో స్టార్ హీరోయిన్ గా సత్తా చాటుతోంది. వైవిధ్య‌మైన చిత్రాలు మరియు ఫీమేల్ ఓరియెంటెడ్ సినిమాలతో త‌న‌కంటూ ప్రత్యేకమైన ఇమేజ్‌ ను క్రియేట్ చేసుకుంది.

అయితే ఇటీవల కాలంలో అమ్మడు సరైన సక్సెస్ అందుకోలేకపోతోంది. చాలా గ్యాప్ తర్వాత తెలుగులో చేసిన 'మిషన్ ఇంపాజిబుల్' సినిమా నిరాశ పరిచింది. అలానే మిథాలీ రాజ్ బయోపిక్ గా తాప్సీ ప్రధాన పాత్రలో తెరకెక్కిన 'శభాష్ మిథు' ఆశించిన విజయం సాధించలేదు.

ప్రస్తుతం పలు క్రేజీ ప్రాజెక్ట్స్ లో నటిస్తున్న తాప్సీ.. ఇప్పుడు ''దో బారా'' (2: 12) అనే మర్డర్ మిస్టరీ డ్రామాతో ప్రేక్షకుల ముందుకు రాబోతోంది. బాలీవుడ్ విలక్షణ దర్శకుడు అనురాగ్ కశ్యప్ ఈ చిత్రానికి దర్శకత్వం వహిస్తున్నారు. రిలీజ్ కు రెడీ అయిన ఈ మూవీ ప్రమోషన్స్ మొదలుపెట్టారు.

తాజాగా 'దో బారా' ట్రైలర్ ను చిత్ర బృందం ఆవిష్కరించింది. 26 ఏళ్ల క్రితం పెద్ద పిడుగుపాటు కారణంగా మరణించిన ఒక చిన్న పిల్లాడు.. అలాంటి ఉరుముల వల్ల ఓ టీవీ ద్వారా తాప్సికి కనెక్ట్ అవ్వడం అనే పాయింట్ ని ఈ ట్రైలర్ లో చూపించారు. మొదట ఇది హారర్ చిత్రంగా ఉండబోతుందని సందేహం కలుగుతుంది. కానీ ట్రైలర్ మొత్తం చూస్తే ఇందులో మరేదో ఉందనేది తెలుస్తుంది.

ఇది టైమ్ ట్రావెల్ కాన్సెప్ట్ ఆధారంగా తీసిన ఒక రకమైన సైన్స్ ఫిక్షన్ సినిమా అని అర్థం అవుతోంది. సస్పెన్స్ అండ్ థ్రిల్లింగ్ ఎలిమెంట్స్ తో కూడిన ఈ ట్రైలర్ ఆధ్యంతం సినిమాపై ఆసక్తిని కలిగించేలా సాగింది. ఇందులో తాప్సి తో పాటుగా నాజర్ - పవలి గులాటి - రాహుల్ భట్ తదితరులు ఇతర పాత్రల్లో కనిపించారు.

'దో బారా' చిత్రాన్ని 2018లో వచ్చిన 'మిరేజ్' అనే స్పానిష్ మూవీకి రీమేక్ గా తెరకెక్కించారని తెలుస్తోంది. 'మన్మర్జియాన్' మరియు 'సాంద్ కీ ఆంఖ్' వంటి సినిమాల తర్వాత అనురాగ్ కశ్యప్ - తాప్సీ కాంబోలో రాబోతున్న ఈ సినిమాపై అందరిలోనూ అంచనాలున్నాయి.

'దో బారా' సినిమాని శోభా కపూర్ - ఏక్తా కపూర్ - సునీత్ ఖేత్రపాల్ మరియు గౌరవ్ బోస్ సంయుక్తంగా నిర్మించారు. ఆగష్టు 19న విడుదల చేయడానికి మేకర్స్ సన్నాహాలు చేస్తున్నారు. ట్రైలర్ తో ఆకట్టుకున్న ఈ మూవీ.. తాప్సీ కి ఎలాంటి సక్సెస్ అందిస్తుందో చూడాలి.