దొంగలున్నారు జాగ్రత్త.. '4×4' రీమేకా? ఫ్రీమేకా?

ఎంఎం కీరవాణి కొడుకు శ్రీ సింహా కోడూరి నటించిన తాజా చిత్రం ''దొంగలున్నారు జాగ్రత్త''. ఇది తెలుగులో తొలి సర్వైవల్ థ్రిల్లర్ చిత్రంగా చెబుతున్నారు. సతీష్ త్రిపుర అనే కొత్త దర్శకుడు తెరకెక్కించిన ఈ సినిమా.. సెప్టెంబర్ 23న సినిమా థియేటర్లలో విడుదలవుతోంది. ప్రమోషన్స్ లో భాగంగా తాజాగా మేకర్స్ ట్రైలర్ ను ఆవిష్కరించారు.

ట్రైలర్ ని బట్టి చూస్తే.. ఒక దొంగ కారులో ఇరుక్కోవడం.. దాని నుండి బయటకు రావడానికి అతను చేసిన ప్రయత్నాలేంటి? అతన్ని ఆ ఉచ్చులో బంధించింది ఎవరు? శత్రువు అలా ఎందుకు చేశారు? చివరకు అతను బయట పడ్డాడా లేదా? అనే అంశాలతో ఈ సర్వైవల్ థ్రిల్లర్ రూపొందినట్లు అర్థమవుతోంది.

తెలుగులో అలాంటి సినిమాలు అరుదుగా వస్తుంటాయి కాబట్టి.. ప్రేక్షకులు ఇష్టపడుతుంటారు. ఇప్పుడు 'దొంగలున్నారు జాగ్రత్త' ట్రైలర్ కూడా అందరి దృష్టిని ఆకర్శించింది. అదే సమయంలో సినిమాలను విస్తృతంగా చూసే మూవీ లవర్స్ కు ''4×4'' అనే స్పానిష్ చిత్రాన్ని గుర్తుకు తెస్తోంది.

'4×4' అనేది 2019లో మరియానో కోన్ అనే దర్శకుడు తెరకెక్కించిన స్పానిష్ క్రైమ్ థ్రిల్లర్. ఒక దొంగ కారుని దొంగిలించే క్రమంలో అందులో ఇరుక్కుపోతాడు. అతను బయటకు రావడానికి ప్రయత్నించినప్పుడు.. డోర్స్ కూడా ఓపెన్ అవ్వవు. బయట ఉన్న ఒక వ్యక్తి ఆ కార్ పై పూర్తి కంట్రోల్ ను కలిగి ఉంటాడు. అయితే అక్కడి నుంచి అతను ఎలా బయటపడ్డాడు? అనేది ఈ సినిమా లైన్.

ఇప్పుడు 'దొంగలున్నారు జాగ్రత్త' ట్రైలర్ చూస్తుంటే.. ఈ సినిమా కూడా అదే కథాంశంతో తెరకెక్కినట్లు సందేహాలు కలిగిస్తుంది. దీనికి తోడు ట్రైలర్ ని కూడా '4×4' మాదిరిగానే కట్ చేశారు. ఒరిజినల్‌ ట్రైలర్‌ నుంచి ఫ్రేమ్‌ టు ఫ్రేమ్‌.. షాట్ టూ షాట్ కాపీ కొట్టినట్లు అనిపిస్తుంది. కాకపోతే అక్కడ అదనంగా కొంత స్టోరీని ట్రైలర్ లో చూపించారు.

రెండు ట్రైలర్స్ ఒకేలా ఉండటంతో 'దొంగలున్నారు జాగ్రత్త' అనేది '4×4' చిత్రానికి అధికారిక రీమేకా? లేదా అనధికారికంగా ఎత్తేసిన ఫ్రీమేకా? అనే కామెంట్స్ ఇప్పుడు సోషల్ మీడియాలో వినిపిస్తున్నాయి. రీమేక్ అయితే అధికారికంగా ఎందుకు ప్రకటించలేదు? అని సందేహాలు వ్యక్తం చేస్తున్నారు.

'దొంగలున్నారు జాగ్రత్త' చిత్రాన్ని సురేష్ ప్రొడ‌క్ష‌న్స్ - గురు ఫిల్మ్స్ బ్యానర్స్ పై డి. సురేష్ బాబు - సునీత తాటి సంయుక్తంగా నిర్మించారు. వీరిద్దరూ గతంలో 'ఓ బేబీ' అనే కొరియన్ రిమేక్ తో హిట్టు కొట్టారు. ఇప్పుడు 'మిడ్‌ నైట్ రన్నర్స్' అనే మరో కొరియన్ రీమేక్ గా తెరకెక్కించిన 'శాకిని డాకిని' సినిమాని రిలీజ్ కు రెడీ చేశారు.

సురేష్ బాబు గతంలో అనేక ఇతర భాషల సినిమాలను రీమేక్ చేసిన సంగతి తెలిసిందే. అయితే అవన్నీ అఫిషియల్ రీమేక్స్ అని ప్రకటించారు. 'శాకిని డాకిని' పోస్టర్స్ లో సైతం రీమేక్ అని మెన్షన్ చేశారు. కానీ వారం గ్యాప్ లో రాబోతున్న 'దొంగలున్నారు జాగ్రత్త' విషయంలో అలా జరగలేదు. మరి దీనిపై రిలీజ్ కు ముందే క్లారిటీ ఇస్తారేమో చూడాలి.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.