టాలీవుడ్ ని చుట్టేసిన ర‌ష్మిక..!

టాలీవుడ్ ని డ్రాకులా ఆవ‌హించింది. అది అంద‌రినీ చ‌ప్ప‌రించేస్తోంది. ఒక‌రు కాదు ఇద్ద‌రు కాదు ప‌రిశ్ర‌మ అగ్ర‌హీరోలంద‌రినీ ఈ డ్రాకులా చుట్టుముట్టింది. ఇంత‌కీ ఈ డ్రాకులా పేరేంటి? అంటే... ర‌ష్మిక మంద‌న‌. ఛ‌లో అనే చిన్న చిత్రంతో బ్లాక్ బ‌స్ట‌ర్ కొట్టింది మొద‌లు ర‌ష్మిక క్రేజీ స్టార్ గా మారిపోయింది. బాలీవుడ్ లో అమితాబ్ అంత‌టి బిగ్ స్టార్ తో క‌లిసి న‌టించేస్తోందంటే త‌న హవా ఏ రేంజులో ఉందో అర్థం చేసుకోవ‌చ్చు.

సూప‌ర్ స్టార్ మ‌హేష్‌.. స్టైలిష్ స్టార్ అల్లు అర్జున్.. విజ‌య్ దేవ‌ర‌కొండ‌.. నితిన్.. ల‌తో బ్లాక్ బ‌స్ట‌ర్లు కొట్టేసిన ర‌ష్మిక మంద‌న త‌దుప‌రి క్రేజీగా రామ్ చ‌ర‌ణ్ స‌ర‌స‌న అవ‌కాశం అందుకుందని గుస‌గుస‌లు వినిపిస్తున్నాయి.

రామ్ చ‌ర‌ణ్ హీరోగా జెర్సీ ఫేం గౌత‌మ్ తిన్న‌నూరి తెర‌కెక్కించే చిత్రంలో ర‌ష్మిక‌ను క‌థానాయిక‌గా ఫైన‌ల్ చేసార‌ని తెలుస్తోంది. యు.వి.క్రియేష‌న్స్‌- ఎన్‌.వి.ఆర్ సినిమా బ్యాన‌ర్ల‌పై ఈ సినిమా తెర‌కెక్క‌నుండ‌గా అధికారిక ప్ర‌క‌ట‌న వెలువ‌డింది. ఇక చెర్రీతో ఆఫ‌ర్ అన‌గానే ఎగిరిగంతేసి మ‌రీ ర‌ష్మిక అంగీక‌రించింద‌ట. ఆర్.ఆర్.ఆర్ త‌ర్వాత ఆర్.సి 15తో రామ్ చ‌ర‌ణ్ పాన్ ఇండియా స్టార్ గా ఓ వెలుగు వెల‌గ‌నున్నాడు. ఇలాంటి స‌మ‌యంలో చ‌ర‌ణ్ తో ఆఫ‌ర్ అంటే పంట పండిన‌ట్టే. అయితే ఈ ఆఫ‌ర్ కి సంబంధించి అధికారికంగా ప్ర‌క‌ట‌న వెలువ‌డాల్సి ఉంది. మ‌రో పాన్ ఇండియా స్టార్ ప్ర‌భాస్ .. యంగ్ టైగ‌ర్ ఎన్టీఆర్ తోనూ భ‌విష్యత్ ప్రాజెక్టుల్లో ర‌ష్మిక‌కు ఆఫ‌ర్లు ఉన్నాయ‌న్న గుస‌గుసా వినిపిస్తోంది.

పుష్ప - ది రైజ్ లో శ్రీ‌వ‌ల్లీగా మెప్పించిన ర‌ష్మిక పుష్ప సీక్వెల్లోనూ న‌టిస్తున్న సంగ‌తి తెలిసిందే. శ‌ర్వానంద్ తో `ఆడవాళ్లు మీకు జోహార్లు` సిద్ధార్థ్ మ‌ల్హోత్రాతో `మిషన్ మజ్ను`.. అమితాబ్ తో `గుడ్ బై` సినిమాలు కూడా చేస్తోంది. బాలీవుడ్ లోనే మ‌రో రెండు చిత్రాల‌కు సంత‌కాలు చేసింద‌ని కూడా టాక్ వినిపిస్తోంది. కేవ‌లం ఈ ఐదారేళ్ల‌లోనే అగ్ర హీరోయిన్ స్థానానికి ఎదిగేసిన రష్మిక‌ను ఇప్పుడు డ్రాకులాతో పోల్చేస్తున్నారు నెటిజ‌నం. ఇదంతా అభిమానంతోనే సుమీ!