దృశ్యం 2 ట్రైలర్: పాత మ‌ర్డ‌ర్ కేసు తిర‌గ‌తోడారు కానీ..!

మ‌ల‌యాళ సూప‌ర్ స్టార్ మోహ‌న్ లాల్ - మీనా జంట‌గా జీతో జోసెఫ్ తెర‌కెక్కించిన దృశ్యం ఎంత‌టి సంచ‌ల‌న విజ‌యం సాధించిందో తెలిసిందే. ఒక ఫ్యామిలీ హ‌త్య‌ చేసి త‌ప్పించుకోవ‌డం అన్న కాన్సెప్టును ఆద్యంతం ర‌క్తి క‌ట్టించేలా తెర‌కెక్కించారు జీతూ. తెలుగులో వెంకీ క‌థానాయ‌కుడిగా.. త‌మిళంలో క‌మ‌ల్ హాస‌న్ క‌థానాయ‌కుడిగా రీమేకై రెండు చోట్లా ఘ‌న‌విజ‌యం సాధించింది. హిందీలో మాత్రం ఆశించిన విజ‌యం ద‌క్కించుకోలేదు.

ప్ర‌స్తుతం లాల్ న‌టించిన దృశ్యం‌ సీక్వెల్ పై ఆస‌క్తి నెల‌కొంది. దృశ్యం 2 ట్రైలర్ తాజాగా రిలీజైంది. ఈ సీరియ‌స్ క్రైమ్ థ్రిల్ల‌ర్ మూవీలో ఎంతో చమత్కారమైన ట్విస్టులున్నాయ‌‌ని.. మోహన్ లాల్ గట్టి పంచ్ ల‌తో ర‌క్తి క‌ట్టించ‌నున్నార‌ని ట్రైల‌ర్ చూస్తే అర్థ‌మ‌వుతోంది. ప్రధాన తారాగణంపై ఆక‌ట్టుకునే రీతిలో ట్రైల‌ర్ ని క‌ట్ చేయ‌డం ఆస‌క్తిని పెంచింది. పదునైన ఎడిటింగ్ .. గ్రిప్పింగ్ ప్రదర్శనలతో సీరియ‌స్ డ్రామా ఎగ్జ‌యిట్ మెంట్ ని పెంచుతోంది.

జార్జ్ కుట్టి(మోహ‌న్ లాల్) అతని కుటుంబం ప్రయాణం మొదటి భాగం నుండి కంటిన్యుటీ ని ట్రైల‌ర్ లో చూపించారు. మొద‌టి భాగంలోని నేరం క్రమం మోహన్ లాల్ జీవితంలో ఎలాంటి ట్విస్టులు ప్ర‌వేశించాయి..? పోలీస్ అధికారులు ఈ కేసును ఎలా పునః సమీక్షించారు? అన్న‌ది ట్రైల‌ర్ లో ఆవిష్క‌రించారు.

ట్రైలర్ ఆద్యంతం ఎంతో తెలివిగా.. ఆస‌క్తిక‌రంగా కనిపిస్తుంది. ఇది ఆడియెన్ మ‌న‌సుల్ని గెలుస్తుంద‌న్న భావ‌న‌ను క‌లిగిస్తోంది. జీతు జోసెఫ్ దర్శకత్వం (ఆయ‌నే ర‌చ‌యిత‌) వహించిన ఈ చిత్రంలో మీనా- సిద్దిక్- ఆశా శరత్- మురళి గోపీ- అన్సిబా- ఎస్తేర్- సైకుమార్ ముఖ్య పాత్రల్లో నటించారు. ఈ చిత్రం ఫిబ్రవరి 19 నుండి అమెజాన్ ప్రైమ్ వీడియోలో ప్రసారం అవుతుంది.