ఎంట్రీ హీరోతో రొమాన్స్ కి సిద్ధమైన బుట్టబొమ్మ!

ప్రస్తుతం తెలుగు తెరపై బుట్టబొమ్మ అందాల భామ పూజ హెగ్డే ట్రెండ్ నడుస్తోంది. వరుస సినిమాలతో బిజీ బిజీగా గడుపుతున్న పూజ ఇటీవలే తన స్పీడ్ పెంచేసింది. 'అరవింద సమేత' - మహర్షిల భారీ విజయాల తర్వాత తన హిట్ల పరంపర కొనసాగిస్తూ ఈ ఏడాది త్రివిక్రమ్ దర్శకత్వంలో తెరకెక్కిన 'అల వైకుంఠపురంలో' సినిమాతో ఇండస్ట్రీ హిట్ ని తన ఖాతాలో వేసుకుంది. అమ్మడి హవా ప్రస్తుతం ఊపు మీద ఉన్నట్లే అన్పిస్తుంది. ఎందుకంటే వరుస ప్రాజెక్ట్ లతో పూజ ఫుల్ బిజీ. ప్రస్తుతం అమ్మడి చేతిలో డార్లింగ్ ప్రభాస్ హీరోగా రాధాకృష్ణ డైరెక్షన్ లో తెరకెక్కుతున్న సినిమాలో నటిస్తోంది. అంతేగాక అఖిల్-బొమ్మరిల్లు భాస్కర్ కాంబినేషన్ లో రూపొందుతున్న 'మోస్ట్ ఎలిజిబుల్ బ్యాచిలర్'లో హీరోయిన్ గా నటిస్తుంది. ఇంకా వరుస భారీ విజయాలతో దూసుకుపోతున్న అమ్మడి కెరీర్ నక్క తోక తొక్కినట్లుగా మారింది. ఆఫర్ల మీద ఆఫర్లు వచ్చి పడుతున్నాయి. టాలీవుడ్ దర్శక నిర్మాతలే కాదు పూజ మీద బాలీవుడ్ దర్శక నిర్మాతల కన్ను పడిందట.

మణిరత్నం 'ఓకే బంగారం' 'మహానటి' సినిమాలతో తెలుగు తెరకు సుపరిచితుడుగా మారాడు కుర్రహీరో దుల్కర్ సల్మాన్. దుల్కర్ కి మలయాళంలో ప్రత్యేక క్రేజ్ ఉంది. ఇంతవరకు తెలుగులో డైరెక్ట్ సినిమా చేయలేదు. ఇక ఈ వెరీ టాలెంటెడ్ దుల్కర్ సల్మాన్ ని తెలుగుతెరకు పరిచయం చేయాలని దర్శకుడు హను రాఘవపూడి ప్లాన్ చేసాడట. ప్రస్తుతం వరుస ప్లాప్ లలో ఉన్నాడు డైరెక్టర్ హను. అయితే హను చేత సోలో హీరోగా తెలుగులో నటించేందుకు రెడీ అవుతున్నాడు దుల్కర్. ఇప్పటికే దుల్కర్‌కు కథ వినిపించి ఓకే చేయించుకున్న హను - పూజాకు కూడా కథను వినిపించాలని చూస్తున్నాడు. ప్రస్తుతం లాక్‌ డౌన్ కారణంగా సినిమాలకు సంబంధించిన ఎలాంటి పనులు కూడా జరగడం లేదు. దీంతో లాక్‌ డౌన్ ముగియగానే పూజా హైదరాబాద్ చేరుకుంటుందని, అప్పుడు ఆమెకు కథ వినిపించి ఓకే చేయించుకోవాలని చిత్ర యూనిట్ చూస్తోంది. పూర్తి రొమాంటిక్ ఎంటర్‌ టైనర్‌ గా ఈ సినిమాను తెరకెక్కించేందుకు డైరెక్టర్ హను టీమ్ రెడీ అవుతుంది. మరి వరుస ప్లాప్ సినిమాలు తీసిన హనుతో దుల్కర్ సోలో హిట్ అందుకుంటాడా.. అనేది సినీ వర్గాలలో చర్చ.