విష్ణు వెనక్కి తగ్గుతాడా?

అనుకున్నదే అయింది. అల్లరి నరేష్‌ సినిమా 'జేమ్స్‌బాండ్‌' ఈ శుక్రవారం విడుదల కావట్లేదు. 'బాహుబలి' విడుదలకు ముందు ఈ నెల 17న విడుదల అని ఘనంగా ప్రకటించుకున్నారు కానీ.. ప్రస్తుతం బాహుబలి ప్రభంజనం చూశాక మాత్రం వెనక్కి తగ్గక తప్పట్లేదు. ఈ సినిమాను ఈ నెల 24కు వాయిదా వేస్తున్నట్లు ప్రకటించారు. అప్పటికి బాహుబలి ప్రభంజనం కొంత తగ్గుతుంది, థియేటర్లు కూడా కొంచెం ఖాళీ అవుతాయి కాబట్టి ఇబ్బంది లేకపోవచ్చు. ఐతే అల్లరోడు ముందుగా స్లాట్‌ బుక్‌ చేసేసుకున్నాడు కాబట్టి ఓకే.. కానీ అదే తేదీకి రావాలనుకుంటున్న మంచు విష్ణు సంగతే తేలాల్సి ఉంది.

బాహుబలి రావడానికి వారం ముందు తన 'డైనమైట్‌' సినిమాను విష్ణు రిలీజ్‌ చేస్తాడని ఆ మధ్య ప్రచారం జరిగింది. కానీ అలాంటిదేమీ లేదని.. 17న లేదంటే 24న తన సినిమా విడుదలవుతుందని ప్రకటించాడు విష్ణు. ఐతే 17న విడుదల చేసే పరిస్థితి లేదని అతడికీ అర్థమైంది. మరి 24న జేమ్స్‌బాండ్‌కు పోటీగా 'డైనమైట్‌'ను తెస్తాడో లేదో చూడాలి. రెండు సినిమాలకూ అంటే థియేటర్లు దొరక్కపోవచ్చు. ఎందుకంటే అప్పటికి బాహుబలి జోరు కొంచెం తగ్గొచ్చు కానీ.. మెజారిటీ థియేటర్లలో ఆడుతుంటుంది. కావాల్సినన్ని థియేటర్లు దొరకవు. అలాంటపుడు రెంటిలో ఒక్కదానికే థియేటర్లు అందుబాటులో ఉంటాయి. మరి ఏది వాయిదా పడుతుంది. ఏది విడుదలవుతుందో చూడాలి.