సమ్మర్ రేసులో మల్టీ'స్టారర్'

టాలీవుడ్ లో సమ్మర్ రేస్ ఇప్పటికే స్టార్ట్ అయిపోయింది. ఊపిరి సక్సెస్ తో వేసవిని సూపర్బ్ గా స్టార్ట్ చేసిన టాలీవుడ్... ఏప్రిల్ 1న ఏకంగా 14 సినిమాల రిలీజ్ లతో కళకళలాడనుంది. ఇక ఏప్రిల్ 8న పవర్ స్టార్ పవన్ కళ్యాణ్ మూవీ సర్దార్ గబ్బర్ సింగ్ రిలీజ్ కానుండడంతో.. ఆ డేట్ ఇప్పటికే లాక్ అయిపోయింది. ఏప్రిల్ 22ను స్టైలిష్ స్టార్ అల్లు అర్జున్ బుక్ చేసేసుకున్నాడు.

అందుకే ఇప్పుడు ఈ రెండింటికీ మధ్యలో ఏప్రిల్ 14న వచ్చేందుకు రెడీ అయిపోతోంది ఓ మల్టీ స్టారర్ మూవీ. మంచు విష్ణు, రాజ్ తరుణ్ లు హీరోలుగా నటిస్తున్న 'ఈడో రకం ఆడో రకం' ను ఏప్రిల్ 14న విడుదల చేయనున్నట్లు నిర్మాతలు ప్రకటించారు. ఆడియో రిలీజ్ ఫంక్షన్ లోనే ఏప్రిల్ 14న విడుదల చేసేందుకు ట్రై చేస్తున్నామని చెప్పారు నిర్మాత అనిల్ సుంకర.. ఏప్రిల్ 14నుంచి వరుసగా సెలవలు ఉండడంతో.. కలెక్షన్స్ విషయంలో బాగా కలిసొచ్చే అంశంగా చెప్పచ్చు. ఓ పంజాబీ మూవీకి తెలుగు రీమేక్ అయిన ఈడో రకం ఆడోరకంలో... మంచు విష్ణుకు జంటగా సోనారికా భడోరియా, రాజ్ తరుణ్ కు జోడీగా హేభా పటేల్ నటించారు.

జి నాగేశ్వర్ రెడ్డి దర్శకత్వంలో తెరకెక్కిన ఈ చిత్రం.. ప్రస్తుతం పోస్ట్ ప్రొడక్షన్ కార్యక్రమాలను జరపుకుంటోంది. త్వరలో విడుదల డేట్ ను అధికారికంగా అనౌన్స్ చేయనుండగా... అదే రోజున విడుదల కానున్న కోలీవుడ్ మూవీ తెరి డబ్బింగ్ వెర్షన్ పోలీసోడుతో ఈ మల్టీ స్టారర్ పోటీ పడాల్సి ఉంటుంది.