మారుతి '3 రోజెస్' లో ఒక గులాబీగా తెలుగమ్మాయి..

టాలీవుడ్ సక్సెస్ ఫుల్ డైరెక్టర్ మారుతి ఇప్పుడు డిజిటల్ వరల్డ్ లో అడుగుపెడుతున్న సంగతి తెలిసిందే. తెలుగు ఓటీటీ ఫ్లాట్ ఫార్మ్ 'ఆహా' కోసం మారుతి ఓ వెబ్ సిరీస్ కు షో రన్నర్ గా వ్యవహరిస్తున్నారు. ''3 రోజెస్'' అనే ఆసక్తికరమైన టైటిల్ తో ఇటీవలే ఈ ఒరిజినల్ సిరీస్ కు సంబంధించిన అధికారిక ప్రకటన ఇచ్చారు. ఈ సందర్భంగా వదిలిన ఫస్ట్ లుక్ పోస్టర్ ఆకట్టుకుంది.

''3 రోజెస్'' సిరీస్ లో ముగ్గురు ముద్దుగుమ్మలు ప్రధాన పాత్రలు పోషిస్తున్నారు. తెలుగు డిజిటల్ స్పేస్ లో ముగ్గురు హీరోయిన్స్ నటిస్తోన్న తొలి వెబ్ సిరీస్ ఇదే. ఫస్ట్ లుక్ లో బార్ లో కూర్చొని ఉన్న ముగ్గురు యువతుల బ్యాక్ సైడ్ లుక్ ని చూపించారు. అయితే వారెవరు అనే విషయాన్ని వెల్లడించలేదు. ఈ నేపథ్యంలో తాజాగా మూడు గులాబీలలో ఒక బ్యూటీని రివీల్ చేశారు.

ఈ వెబ్ సిరీస్ లో తెలుగమ్మాయి ఈషా రెబ్బా ఒక హీరోయిన్ గా నటిస్తోంది. తాజాగా ఆమె పాత్రకు సంబంధించిన లుక్ ని విడుదల చేశారు. ఇందులో రీతూ అనే గర్ల్ నెక్స్ట్ డోర్ వంటి ఈషా కనిపించనుంది. ఫస్ట్ లుక్ లో అటు సాంప్రదాయ బద్ధంగా శారీలో ఇటు మోడ్రన్ డ్రెస్ లో ఈషా ను చూపించారు. దీనిని బట్టి చూస్తే అమ్మడి పాత్రలో రెండు షేడ్స్ ఉంటాయని అర్థం అవుతోంది. ఇప్పటికే 'పిట్ట కథలు' సిరీస్ లో అలరించిన ఈషా రెబ్బా.. ''3 రోజెస్'' తో ఎలాంటి గుర్తింపు తెచ్చుకుంటుందో చూడాలి.

ఈషా రెబ్బా ఈ ఒరిజినల్ లో తన క్యారక్టర్ గురించి మాట్లాడుతూ.. ''మిమ్మల్ని రీతుకు పరిచయం చేయడం నాకు చాలా ఆనందాన్ని ఇస్తుంది. ఆమె మిమ్మల్ని మంత్రముగ్దులను చేస్తుంది. ఆమె కోరుకునే ప్రపంచాన్ని మరియు ఆమె తల్లిదండ్రులు కోరుకునే ప్రపంచాన్ని గారడీ చేస్తుంది. ఆమె గురించి మరింత తెలుసుకోవడానికి 'ఆహా' లో రానున్న '3 రోజెస్' కోసం వేచి ఉండండి'' అని పేర్కొన్నారు. త్వరలోనే మిగతా ఇద్దరు గులాబీలను కూడా మేకర్స్ రివీల్ చేయనున్నారు.

కాగా, 'ఈరోజుల్లో' 'భలే భలే మగాడివోయ్' 'మహానుభావుడు' 'ప్రతిరోజూ పండగే' వంటి సినిమాలతో ప్రేక్షకులను కడుపుబ్బా నవ్వించిన మారుతి.. ''3 రోజెస్'' వెబ్ సిరీస్ ని ఏ విధంగా తీర్చిద్దారో అనే ఆసక్తి అందరిలో నెలకొంది. రవి నంబూరి ఈ సిరీస్ కు కథ అందించగా.. మ్యాగీ దర్శకత్వం వహిస్తున్నారు. సన్నీ ఎమ్.ఆర్ ఈ సిరీస్ కు సంగీతం సమకూర్చగా.. బాల్ రెడ్డి సినిమాటోగ్రఫీ అందిస్తున్నారు. ఎస్బీ ఉద్ధవ్ ఎడిటింగ్ వర్క్ చేస్తున్నారు. యాక్షన్ కట్ మూవీస్ ఎల్ఎల్పి బ్యానర్ పై ఎస్.కె.ఎన్ ఈ ఒరిజినల్ ను నిర్మిస్తున్నారు.

100 శాతం తెలుగు కంటెంట్ తో ప్రేక్షకులకు ఎప్పటికప్పుడు సరికొత్త వినోదాన్ని అందించడానికి కృషి చేస్తోన్న 'ఆహా' కు సరికొత్త తెలుగు ఒరిజినల్ షో ''3 రోజెస్'' ఎలాంటి ఆదరణ తెచ్చిపెడుతుందో చూడాలి. త్వరలోనే ఈ సిరీస్ కు సంబంధించిన ఇతర వివరాలు వెల్లడి కానున్నాయి.