తెల్లగా లేని హీరోలను ఇలా ఎందుకు అడగరు?

తెలుగు ఫిలిం ఇండస్ట్రీలో అరుదై పోయిన విషయం ఏంటంటే అచ్చతెలుగు హీరోయిన్లు కనిపించడం. కారణాలేవైనా ఈషా రెబ్బా మాత్రం ఆ అడ్డంకులను దాటుకుని తనకంటూ ఒక గుర్తింపు తెచ్చుకుంది. టాప్ లీగ్ హీరోయిన్స్ లిస్టు లో చేరేందుకు గట్టిగా ప్రయత్నాలు చేస్తోంది. ఈ భామ సోషల్ మీడియాలో కూడా చాలా యాక్టివ్ గా ఉంటుంది. రీసెంట్ గా ఒక నెటిజన్ స్కిన్ కలర్ విషయంలో కామెంట్ చేయడంతో అతనికి గట్టిగా సమాధానం ఇచ్చింది.

తన చర్మం రంగు విషయం లో చాలా సంతోషంగా ఉన్నానని తెలిపింది. అలానే ఒక హీరో కు రంగు విషయంలో ఇలాంటి వివక్ష ఎదురుకాదని కానీ మన నేటివిటీ తో సంబంధం లేకుండా హీరోయిన్లు మాత్రం తెల్లగా ఉండాలనే అభిప్రాయం ఎందుకు అందరిలో ఉందని ప్రశ్నించింది. అంతే కాదు ఫెయిర్ గా ఉంటేనే అందంగా ఉంటారనే అభిప్రాయం సరికాదని అదో పిచ్చితనం అని ఘాటుగా జవాబిచ్చింది. ఈషా ఇచ్చిన సమాధానాన్ని చాలామంది సపోర్ట్ చేయడమే కాకుండా ఎన్ని అడ్డంకులున్నా హార్డ్ వర్క్ తో హీరోయిన్ గా తనకంటూ ప్రత్యేక గుర్తింపు తెచ్చుకున్నందుకు తనను ప్రశంసించారు.

ఇక ఈషా సినిమాల విషయానికి వస్తే రీసెంట్ గా ఎన్టీఆర్ చిత్రం 'అరవింద సమేత' లో సెకండ్ హీరోయిన్ గా నటించింది. త్వరలో రిలీజ్ కానున్న సుమంత్ సినిమా 'సుబ్రమణ్యపురం' లో కూడా ఈషానే హీరోయిన్.