'ఈశ్వరుడే'.. బింబిసారుడి పాత్ర స్వభావాన్ని ఆవిష్కరించే గీతం..!

నందమూరి కల్యాణ్ రామ్ నటించిన సోషియో ఫాంటసీ యాక్షన్ మూవీ ''బింబిసార''. ‘ఏ టైమ్ ట్రావెల్ ఫ్రమ్ ఈవిల్ టు గుడ్’ అనేది దీనికి ట్యాగ్ లైన్. ఇందులో కేథరిన్ థ్రెసా - సంయుక్త మీనన్ - వారీనా హుస్సేన్ హీరోయిన్లుగా నటించారు. రిలీజ్ కు రెడీ అయిన ఈ సినిమాకు సంబంధించిన ప్రమోషన్స్ జోరుగా సాగుతున్నాయి.

'బింబిసార' చిత్రం నుంచి ఇప్పటి వరకు విడుదలైన ఫస్ట్ లుక్ మరియు టీజర్ అందరిలో ఆసక్తిని రేకెత్తించాయి. ఇటీవల వచ్చిన ట్రైలర్ సినిమాపై అంచనాలు రెట్టింపు చేసింది. ఈ నేపథ్యంలో మేకర్స్ తాజాగా 'ఈశ్వరుడే' అనే ఫస్ట్ సింగిల్ తో మ్యూజికల్ ప్రమోషన్స్ మొదలుపెట్టారు.

'భువి పై ఎవడూ కనివిని ఎరుగని అద్భుతమే జరిగినే.. దివిలో సైతం కథగా రాని విధి లీలే వెలిగినే..' అంటూ సాగిన ఈ పాట శ్రోతలను విశేషంగా ఆకట్టుకుంటోంది. రక్షకుడివో రాక్షసుడివో అంటూ తిగర్తల సామ్రాజ్యపు చక్రవర్తి బింబిసారుడి స్వభావాన్ని ఈ గీతంలో ఆవిష్కరించే ప్రయత్నం చేశారు.

'ఈశ్వరుడే' పాటకు చిరంతన్ భట్ స్వరాలు సమకూర్చగా.. కాల భైరవ ఇంటెన్స్ వాయిస్ తో అద్భుతంగా ఆలపించారు. లిరిసిస్ట్ శ్రీమణి అర్థవంతమైన సాహిత్యం అందించారు. విజువల్ గానూ ఈ సాంగ్ కనువిందు చేయనుందని లిరికల్ వీడియో చూస్తే అర్థం అవుతుంది.

'బింబిసార' సినిమాతో మల్లిడి వశిష్ఠ్ అనే నూతన దర్శకుడు ఇండస్ట్రీకి పరిచయం అవుతున్నాడు. ఇందులో కళ్యాణ్ రామ్ ద్విపాత్రాభినయంలో కనిపించనున్నారు. వెన్నెల కిషోర్ - బ్రహ్మాజీ - శ్రీనివాస రెడ్డి ఇతర ప్రధాన పాత్రలు పోషించారు.

కళ్యాణ్ రామ్ సమర్పణలో నందమూరి తారక రామారావు ఆర్ట్స్‌ బ్యానర్ పై హరికృష్ణ ఈ చిత్రాన్ని నిర్మించారు. ఎంఎం కీరవాణి బ్యాక్ గ్రౌండ్ స్కోర్ అందించిన ఈ చిత్రానికి ఛోటా కె నాయుడు సినిమాటోగ్రఫీ నిర్వహించారు. 'బింబిసార' చిత్రాన్ని ప్రపంచ వ్యాప్తంగా 2022 ఆగస్ట్ 5న విడుదల చేయనున్నారు.