మీటూ : మూడు నెలలు నరకయాతన పెట్టాడు!

బాలీవుడ్‌ లో ఇంత కాలం ఉన్న లైంగిక వేదింపులు ఇప్పుడు ఒక్కసారిగా బయటకు వస్తున్నాయి. బయట పడేందుకు భయపడ్డ వారు ఇప్పుడు మీటూ ఉద్యమంలో భాగంగా తమపై జరిగిన లైంగిక దాడులను చెప్పేందుకు మీడియా ముందుకు వస్తున్న విషయం తెల్సిందే. నానా పటేకర్‌పై తనూశ్రీ దత్తా చేసిన ఆరోపణల తర్వాత వరుసగా మీటూ అంటూ ఎంతో మంది సెలబ్రెటీలు బాలీవుడ్‌ లో పెద్ద మనుషులుగా చెలామణి అవుతున్న వారిపై లైంగిక ఆరోపణలు చేశారు, చేస్తూనే ఉన్నారు. తాజాగా మరో షాకింగ్‌ విషయం బయట పడినది.

బాలీవుడ్‌ ప్రముఖ దర్శక నిర్మాత విపుల్‌ షాపై ఇరాన్‌ కు చెందిన మోడల్‌ ఇల్నాజ్‌ నొరౌజీ సంచలన ఆరోపణలు చేసింది. తనను నమస్తే ఇంగ్లాండ్‌ సినిమా కోసం ఆడిషన్స్‌ కు పిలిచారని - మూడు నెలల పాటు ఆడిషన్స్‌ అంటూ నరకయాతన పెట్టారని - చివరకు నాకు సినిమాలో ఛాన్స్‌ కూడా ఇవ్వలేదని ఆమె పేర్కొంది. ఆడిషన్స్‌ పేరుతో నాతో చాలా అసభ్యంగా ప్రవర్తించాడని - ముద్దు పెట్టుకునేందుకు ప్రయత్నించడంతో పాటు - పలు రకాలుగా శారీరక హింసకు పాల్పడేవాడని ఇల్నాజ్‌ చెప్పుకొచ్చింది.

నమస్తే ఇంగ్లాండ్‌ లో కీలక పాత్ర కోసం ఆడిషన్స్‌ అంటూ నన్ను రమ్మని - నన్ను లైంగికంగా వేదించాడని - విపుల్‌ షా పలు సార్లు నా పిరుదులు పట్టుకుని దగ్గరకు లాగే ప్రయత్నం చేశాడని - మద్దు పెట్టడంతో పాటు - నా ప్రైవేట్‌ ప్లేస్‌ లో టచ్‌ చేసేందుకు చూసేవాడంటూ ఆగ్రహం వ్యక్తం చేసింది. ఆడిషన్స్‌ అంటూ నన్ను పిలిచి అసలు ఆడిషన్స్‌ చేయలేదు - సినిమాలో ఛాన్స్‌ ఇవ్వలేదని చెప్పింది. ఎంతో మందిని కూడా విపుల్‌ షా లైంగికంగా వేదించాడంటూ సోషల్‌ మీడియాలో కామెంట్స్‌ వినిపిస్తున్నాయి. ఇప్పటికే ఎంతో మంది బాలీవుడ్‌ ఫిల్మ్‌ మేకర్స్‌ లైంగిక వేదింపుల ఆరోపణలు ఎదుర్కొంటున్నారు. ఈ సమయంలోనే విపుల్‌ షా ఆ జాబితాలో చేరాడు.