మహర్షి: ఆ సీన్ తో ఎమోషన్స్ పీక్స్ కు వెళ్తాయట

సూపర్ స్టార్ మహేష్ బాబు ప్రస్తుతం వంశీ పైడిపల్లి దర్శకత్వంలో 'మహర్షి' చిత్రంలో నటిస్తున్నాడు. మెజారిటీ భాగం షూటింగ్ పూర్తి చేసుకున్న ఈ సినిమా ఏప్రిల్ లోనే విడుదల కావలసి ఉన్నప్పటికీ వాయిదా పడే అవకాశాలు ఉన్నాయని గత వారం రోజులుగా వార్తలు వస్తున్నాయి. రిలీజ్ విషయంలో త్వరలోనే క్లారిటీ వచ్చే అవకాశం ఉంది. ఇదిలా ఉంటే ఈ సినిమా కథ గురించి సినివర్గాలలో ఒక ఇంట్రెస్టింగ్ టాక్ వినిపిస్తోంది.

'మహర్షి' లో మహేష్ బాబు ఒక ధనికుడైన ఎన్నారై పాత్రలో నటిస్తున్నాడు. మహేష్ స్నేహితుడి పాత్ర పోషిస్తున్న అల్లరి నరేష్ కారణంగా ఇండియాకు తిరిగి వస్తాడని ఇక్కడ రైతు సమస్యలపై పోరాటం చేస్తాడని ఇప్పటికే వార్తలు వచ్చాయి. మహేష్ అమెరికా నుండి అసలు భారతదేశానికి ఎందుకు తిరిగి వస్తాడు అంటే.. ఫ్రెండ్ సమస్యల్లో చిక్కుకున్నందుకు కాదట. అల్లరి నరేష్ పాత్ర మరణిస్తుందని.. ప్రాణ స్నేహితుడి మరణం మహేష్ పై తీవ్ర ప్రభావం చూపిస్తుందని.. దీంతో సమాజంలో మార్పు తీసుకొచ్చేందుకు నడుం బిగిస్తాడని సమాచారం. అల్లరి నరేష్ మరణం ఎపిసోడ్ ప్రేక్షకుల చేత కన్నీరు పెట్టిస్తుందని.. ఆతర్వాత మహేష్ తీసుకున్న నిర్ణయాలు.. సమాజంలో మార్పు తీసుకొచ్చేందుకు చేసే ప్రయత్నాలు ప్రేక్షకులచేత విజిల్స్ వేయించేలా ఉంటాయని టాక్.

ఈ సినిమాలో మహేష్ బాబుకు జోడీగా పూజా హెగ్డే నటిస్తోంది. దేవీ శ్రీప్రసాద్ ఈ చిత్రానికి సంగీతం అందిస్తున్నాడు. దిల్ రాజు - అశ్విని దత్ - ప్రసాద్ వీ పొట్లూరి ఈ సినిమాను సంయుక్తంగా నిర్మిస్తున్నారు.