రవిశాస్త్రికి షాకింగ్ గా మారిన ‘అజహర్’

వివాదాలకు కేరాఫ్ అడ్రస్ గా నిలిచే ఒకప్పటి టీమిండియా కెప్టెన్ మహ్మద్ అజారుద్దీన్ జీవితకథగా చెబుతున్న అజహర్ చిత్రం ఇప్పుడు వివాదంలోకి కూరుకుపోయింది. ఇమ్రాన్ హష్మీ కథానాయకుడిగా నటించిన ఈ చిత్రంలో పలు పాత్రల్ని చూపించిన తీరు పట్ల తీవ్ర వ్యతిరేకత వ్యక్తమవుతోంది. సినిమా స్టార్టింగ్ లో ఈ చిత్రం రియల్ కాదని.. కల్పితమని కార్డేసినా.. ఈ చిత్రంలోని పలు పాత్రలు ఎవరిని ఉద్దేశించినవో స్పష్టంగా తెలిసే పరిస్థితి. నాటి క్రికెటర్ల పూర్తి పేరును ఉపయోగించకుండా పొట్టి పేర్లతో అందరికి అర్థమయ్యేలా చిత్రీకరించిన కొన్ని పాత్రలు వ్యవహారం ఇప్పుడు వివాదాస్పదంగా మారింది

ఈ చిత్రంలో రవిశాస్త్రి పాత్రను చూపించిన తీరు పట్ల ప్రస్తుతం ఆయన తీవ్ర ఆగ్రహంతో ఉన్నారట. ఇక.. ఆయన కుటుంబ సభ్యులైతే అజహర్ మీద నిప్పులు చెరుగుతున్నారట. నిజానికి రియల్ లైఫ్ లోనూ అజహర్ కు.. రవిశాస్త్రికి పడదని చెబుతారు. మ్యాచ్ ఫిక్సింగ్ వ్యవహారంలో అజహర్ ను బుక్ చేసేందుకు రవిశాస్త్రి సాయం చేశారన్న ఆరోపణ ఉంది. తనను ఇంతగా ఇబ్బంది పెట్టిన రవిశాస్త్రి మీద అజహర్ తన చిత్రం ద్వారా కసి తీర్చుకున్నారన్న అభిప్రాయం వ్యక్తమవుతోంది.

ఇక..సినిమాలోకి వెళితే.. రవి పాత్రకు అమ్మాయిలంటే విపరీతమైన పిచ్చి అన్నట్లుగా చూపించటమే కాదు.. ఓ సీరిస్ సందర్భంగా తన వెంట ఉన్న భార్యను మోసం చేసి అతనో అమ్మాయితో గడిపినట్లుగా చూపించటం రవిశాస్త్రిని షాక్ కు గురి చేసినట్లుగా చెబుతున్నారు. తనను స్త్రీ లోలుడిగా చూపించిన తీరు పట్ల ఆగ్రహం వ్యక్తం చేస్తున్న రవిశాస్త్రి చిత్ర యూనిట్ మీద న్యాయపరమైన చర్యలు తీసుకోవాలని భావిస్తున్నట్లు తెలుస్తోంది. ఈ విషయం మీద ఇప్పటికే బీసీసీఐకి ఫిర్యాదు చేసినట్లు చెబుతున్నారు. అజహర్ చిత్రం రవిశాస్త్రి ఫ్యామిలీకి పెద్ద షాక్ గా మారిందట. ఇక.. అజహర్ మాజీ భార్య సంగీతా బిజిలానీ కూడా తన పాత్రను చూపించిన తీరుపట్ల అసంతృప్తిగా ఉన్న విషయం తెలిసిందే.