జాత‌రో జాత‌ర మంచోడి జాత‌రేమిటో!

సంక్రాంతి బ‌రిలో స్టార్ వార్ గురించి భారీ బెట్టింగ్ గురించి ఆస‌క్తిక‌ర చ‌ర్చ సాగుతోంది. ఇప్ప‌టికే నాలుగైదు పుంజులు క‌త్తిగ‌ట్టి బ‌రిలో దిగుతున్న సంగ‌తి తెలిసిందే. స‌రిలేరు నీకెవ్వ‌రు.. అల వైకుంఠ‌పుర‌ములో.. ద‌ర్బార్ లాంటి భారీ చిత్రాలు ఈ సీజ‌న్ లో రిలీజవుతున్నాయి. మ‌హేష్‌-బ‌న్ని లాంటి క్రేజీ స్టార్ల‌తో పోటీప‌డుతూ సూప‌ర్ స్టార్ ర‌జ‌నీకాంత్ న‌టించిన ద‌ర్బార్ చిత్రాన్ని రిలీజ్ చేస్తున్నారు. ఇంత ఠ‌ఫ్‌ ఫైట్ న‌డుమ నంద‌మూరి క‌ళ్యాణ్ రామ్ సాహ‌సం గురించి ఆస‌క్తిక‌ర చ‌ర్చ సాగుతోంది.

క‌ళ్యాణ్ రామ్ న‌టించిన `ఎంత మంచివాడ‌వురా!` సంక్రాంతి కానుక‌గా జ‌న‌వ‌రి 15న రిలీజ్ కానుంద‌ని అధికారికంగా ప్ర‌క‌టించేశారు. ఇప్ప‌టికే చిత్రీక‌ర‌ణ పూర్తి చేసి నిర్మాణానంత‌ర ప‌నుల్ని శ‌ర‌వేగంగా పూర్తి చేస్తున్నారు. ప‌ట్టుమ‌ని 20రోజులు కూడా లేదు. అందుకే ఇక‌పై ప్ర‌చారంలో వేగం పెంచుతోంది టీమ్. ఇత‌ర సంక్రాంతి పుంజుల‌తో పోలిస్తే మంచోడి స్పీడ్ త‌క్కువ‌గానే ఉంద‌న్న విమ‌ర్శ‌లు రావ‌డంతో ఈ జాగ్ర‌త్త‌లు తీసుకుంటున్నారు.

ఇప్ప‌టికే రిలీజైన పోస్ట‌ర్లు.. టీజ‌ర్ కి అద్భుత స్పంద‌న వ‌చ్చింది. మంచి వాడి ఇర‌గ‌కుమ్ముడేమిటో! అంటూ టీజ‌ర్ చూశాక అభిమానులు ముచ్చ‌టించుకున్నారు. త‌దుప‌రి ఈ చిత్రం నుంచి ఓ లిరిక‌ల్ వీడియోని రిలీజ్ చేస్తున్నారు. బిగ్ బాస్ 3 విన్న‌ర్ రాహుల్ సిప్లిగంజ్ ఆల‌పించిన `జాత‌రో జాత‌ర..` పాట‌ను రిలీజ్ చేయ‌నున్నారు. 27 డిసెంబ‌ర్ 5.09 పీఎం ఈ పాట‌ను రిలీజ్ చేస్తున్నామ‌ని.. ప‌ర్ఫెక్ట్ ఫెస్టివ‌ల్ సాంగ్ అని తాజాగా పోస్ట‌ర్ ని రిలీజ్ చేయ‌డం ఆస‌క్తిని రేకెత్తిస్తోంది. ఈ పోస్ట‌ర్ చూస్తే.. బీచ్ లో జాత‌ర‌కు సంబంధించిన స్టిల్ స్పెష‌ల్ గా ఆక‌ట్టుకుంది. జాత‌ర అంటే జాల‌రుల‌కు సంబంధించిన జాత‌ర అని బ్యాక్ గ్రౌండ్ క్రౌడ్ ని చూస్తే అర్థ‌మ‌వుతోంది. మ‌రి మంచోడి జాత‌ర దేనికో తేలాల్సి ఉంది.