హైప్ పెంచేందుకు మంచివాడి ప్రయత్నాలు!

ఈ సంక్రాంతి రేసులో మహేష్ బాబు.. అల్లు అర్జున్.. రజనీకాంత్ సినిమాలతో పాటు నందమూరి కళ్యాణ్ రామ్ సినిమా కూడా విడుదలవుతోంది. ఈ సినిమాల్లో చిన్న సినిమా కళ్యాణ్ రామ్ నటించిన 'ఎంత మంచివాడవురా'. ప్రస్తుతం బజ్ తక్కువ ఉండేది కూడా దీనికే. నిజానికి తెలుగు ప్రేక్షకులు ఈ సినిమానే కాదు.. రజనీ సినిమాను కూడా పెద్దగా పట్టించుకోవడం లేదు. అందరి దృష్టి మహేష్.. అల్లు అర్జున్ సినిమాల పైనే ఉంది.

దీంతో కళ్యాణ్ రామ్ సినిమాకు సంబంధించిన ప్రోమోస్ విడుదల అవుతున్నప్పటికీ పెద్దగా హైప్ మాత్రం రావడం లేదు. ఎక్కడ చూసినా మహేష్.. బన్నీ సినిమాల పోటీ గురించి చర్చలు సాగుతున్నాయి కానీ సంక్రాంతికి కళ్యాణ్ రామ్ సినిమాకు సంబంధించిన సందడి ఎక్కడా కనపడడం లేదు. 'ఎంత మంచివాడవురా' టీమ్ ఈ విషయాన్ని గుర్తించి సినిమాకు హైప్ ను పెంచే దిశగా ప్లాన్ చేస్తున్నారట.

ఈ సినిమా ట్రైలర్ త్వరలో రిలీజ్ చేయాలని ప్లాన్ చేస్తున్నారట. సినిమాకు ఒక పవర్ ఫుల్ ట్రైలర్ కట్ చేసే ప్రయత్నాలలో ఉన్నారట. అంతే కాకుండా జనవరి మొదటి వారంలో ప్రీరిలీజ్ ఈవెంట్ జరిపే సన్నాహాలు చేస్తున్నారట. ఈ కార్యక్రమానికి యంగ్ టైగర్ ఎన్టీఆర్ ను తీసుకువస్తే ఆటోమేటిక్ గా సినిమాపై అందరి దృష్టి పడుతుందని భావిస్తున్నారట. మరి 'ఎంత మంచివాడవురా' టీమ్ ప్రయత్నాలు ఎంతమేరకు ఫలిస్తాయో వేచి చూడాలి.