వావ్.. ఆ సినిమాకు హాలీవుడ్ ప్రశంసలు

ఎప్పుడూ హాలీవుడ్ సినిమాల్ని మనం చూసి ఆశ్చర్యపోవడమే తప్ప.. మన సినిమాల గురించి వాళ్లు మాట్లాడ్డం ఉండదు. మన సినిమాల్ని పొగడ్డం తర్వాత.. కనీసం మన సినిమాల గురించి వాళ్లు ప్రస్తావించడం కూడా జరగదు. వాళ్ల సినిమాల్ని మనం కాపీ కొట్టి సినిమాలు తీస్తుంటే మన మీద వాళ్లకు గౌరవం లేకపోవడం ఆశ్చర్యమేమీ లేదు. ఐతే ఇప్పుడో ఇండియన్ మూవీ గురించి హాలీవుడ్ దర్శకుడొకరు గొప్పగా మాట్లాడాడు. ఆ సినిమానే.. గత శుక్రవారం తమిళ, తెలుగు భాషల్లో విడుదలైన మయూరి (మాయ). ఈ హార్రర్ మూవీ.. హాలీవుడ్ హార్రర్ మూవీల స్పెషలిస్టు ఎరిక్ ఇంగ్లాండ్ ను ఆశ్చర్యపరిచింది.

రోడ్ సైడ్ - కాంట్రాక్టెడ్ లాంటి హార్రర్ సినిమాలతో ప్రపంచ వ్యాప్తంగా హార్రర్ ప్రియుల్ని అలరించిన ఎరిక్.. మాయ సినిమా చూసి ఆశ్చర్యపోయాడు. ఈ సినిమాపై ప్రశంసలు కురిపించాడు. ‘మాయ’ సినిమా గురించి తనకీ మధ్య తెలిసిందని.. చూశాక చాలా బాగా అనిపించిందని.. నిజమైన హార్రర్ అంశాలున్న కథ ఇదని ఎరిక్ అన్నాడు. ఈ మూవీ తనను వెంటాడుతోందని.. నటీనటుల పెర్ఫామెన్స్ అదిరిపోయిందని.. సౌండ్ డిజైన్, మ్యూజిక్.. ఇలా ప్రతిదీ చక్కగా కుదిరిందని.. తాను ఇంతకుముందు చూసిన హార్రర్ సినిమాలతో పోలిస్తే ‘మాయ’ యునీక్ గా ఉందని ఎరిక్ కితాబివ్వడం విశేషం. ఓ హాలీవుడ్ హార్రర్ స్పెషలిస్టు ఓ తమిళ సినిమా గురించి ఇలా ప్రశంసించడం చాలా పెద్ద విశేషం. ఈ క్రెడిట్ 24 ఏళ్ల కుర్ర డైరెక్టర్ అశ్విన్ శరవణన్ కే దక్కుతుంది.