బాలయ్య సెంచరీలో వాటా కోసం పోటీ

నందమూరి నటసింహం ఇప్పుడు 99వ చిత్రం షూటింగ్ లో మహా బిజీ. డిక్టేటర్ సూపర్ స్పీడ్ గా తన స్టైల్ లో ఫినిష్ చేస్తున్నాడు బాలయ్య. త్వరలో ప్రారంభం కానున్న ఢిల్లీ షెడ్యూల్ తో టాకీపార్ట్ షూటింగ్ ఫినిష్ కానుంది. ఇంకా ఈ మూవీ రిలీజ్ కి రెడీ అవక ముందే.. బాలకృష్ణ వందో సినిమాకి ప్రిపరేషన్స్ జరిగిపోతున్నాయి. డిక్టేటర్ నిర్మాణంలో బాలీవుడ్ నిర్మాణ సంస్థ ఈరోస్ ఇంటర్నేషనల్ కూడా ఒక భాగస్వామి.

ఈ సంస్థ బాలయ్య వందో చిత్రాన్ని కూడా ప్రొడ్యూస్ చేసేందుకు ఉవ్విళ్లూరుతోంది. ఇప్పటికే దీనికి సంబంధించిన ప్రతిపాదన కూడా బాలకృష్ణకు అందినట్లు సమాచారం. స్థానికంగా ఏదైనా ప్రొడక్షన్ హౌజ్ తో కలిసి.. బాలయ్య వందో సినిమాని నిర్మించాలన్నది ఈరోస్ ఆలోచన. అయితే.. ఈ డీల్ అంత తేలిగ్గా కుదిరేదేం కాదు. ఎందుకంటే గతంలో లెజెండ్ ని నిర్మించిన 14రీల్స్ ఎంటర్ టెయిన్ మెంట్ - వారాహి చలనచిత్ర సంస్థలు కూడా ఈ రేస్ లో ఉన్నాయి. బాలయ్యతో వందో సినిమా ఎంతో ప్రతిష్టాత్మకం కావడంతో.. ఈ ప్రాజెక్టులో భాగమయ్యేందుకు కంపెనీలు పడుతున్నాయి.

వీటికితోడు ఈ మూవీని.. బాలయ్యకు సింహ - లెజెండ్ లాంటి బ్లాక్ బస్టర్స్ అందించిన బోయపాటి శ్రీను డైరెక్షన్ లో తీయనున్నారనే విషయం ఇప్పటికే ఫైనల్ అయింది. వీళ్లిద్దరి కాంబినేషన్ అంటే.. ఖచ్చితంగా బ్లాక్ బస్టర్ అనే అంచనాలున్నాయి ఇండస్ట్రీలో. అందుకే ఈ అవకాశాన్ని ఎట్టిపరిస్థితుల్లోనూ వదులుకోకూడదని నిర్మాణ సంస్థలు అనుకుంటున్నాయి. లెట్స్ సీ.. ఏ కంపెనీకి ఈ లక్కీ ఛాన్స్ దొరుకుతుందో.