అల్లరోడితో మళ్లీ ఆ డైరెక్టర్

ఒకప్పుడు అల్లరి నరేష్ కెరీర్ మూడు షూటింగులు.. ఆరు కథా చర్చలు అన్నట్లుండేది. టాలీవుడ్ లో దర్శకులుగా మారాలనుకునే కుర్రాళ్లకు అల్లరి నరేష్ ఈజీ ఆప్షన్ లా కనిపించేవాడు. ఒక సినిమా తేడా కొట్టి ఇంకో సినిమా ఆడేసేది. ఫ్లాప్ అయినా సినిమాకు కూడా నిర్మాతలు సేఫ్ జోన్ లో ఉండేవాళ్లు. కానీ రాను రాను పరిస్థితి మారిపోయింది. వరుస ఫ్లాపులతో నరేష్ కెరీర్ బాగా దెబ్బ తిని.. మార్కెట్ లేకుండా పోయింది. దీని ఈ మధ్య ఒకదాని తర్వాత ఒకటి ఆచి తూచి సినిమాలు చేస్తున్నాడు అల్లరోడు. అతడి కొత్త సినిమా ‘మామ మంచు అల్లుడు కంచు’ ఈ నెలాఖరులో విడుదలకు ముస్తాబవుతోంది.

ఇంతలో తన కొత్త సినిమాకు శ్రీకారం చుట్టాడు నరేష్. ఇంతకుముందు అల్లరి నరేష్ తో ‘సిద్ధు ఫ్రమ్ శ్రీకాకుళం’ లాంటి యావరేజ్ మూవీ తీసిన ఈశ్వర్ రెడ్డి ఈ సినిమాకు దర్శకత్వం వహిస్తున్నాడు. అల్లరోడి చొరవతో దర్శకుడైన ఈశ్వర్.. తన రెండో ప్రయత్నంలో తీసిన ‘సీతారాముల కళ్యాణం.. లంకలో’ప్రేక్షకుల్ని ఆకట్టుకోలేదు. ఇప్పుడిక చాలా గ్యాప్ తీసుకుని మళ్లీ తన ఫస్ట్ హీరోతో సినిమా చేస్తున్నాడు. అనిల్ సుంకర ఈ సినిమాను మరో నిర్మాతతో కలిసి నిర్మిస్తున్నాడు. హీరోయిన్ ను ఎంపిక చేయాల్సి ఉంది. షూటింగ్ లాంఛనంగా మొదలైంది. వచ్చే ఏడాది వేసవికి రిలీజ్ చేయబోతున్నారు.