'లవ్ స్టోరీ' నుంచి మరో బ్యూటిఫుల్ సాంగ్.. 'ఏవో ఏవో కలలే'..!

యువ సామ్రాట్ అక్కినేని నాగచైతన్య - సాయి పల్లవి జంటగా సెన్సిబుల్ డైరెక్టర్ శేఖర్ కమ్ముల రూపొందిస్తున్న సినిమా ''లవ్ స్టోరీ''. వేసవి కానుకగా ఏప్రిల్ 16న ఈ చిత్రాన్ని ప్రేక్షకుల ముందుకు తీసుకురానున్నారు. ఈ నేపథ్యంలో ఇప్పటికే విడుదల చేసిన టీజర్ - సాంగ్స్ మంచి స్పందన తెచ్చుకొని సినిమాపై అంచనాలు పెంచేశాయి. ఈ క్రమంలో సెన్సేషన్ క్రియేట్ చేయడానికి 'ఏవో ఏవో కలలే' అనే పాటను వదిలారు. తాజాగా సూపర్ స్టార్ మహేష్ బాబు ఈ సాంగ్ లిరికల్ వీడియో విడుదల చేసి చిత్ర బృందానికి బెస్ట్ విషెస్ తెలియజేసారు.

'ఏవో ఏవో కలలే.. ఎన్నో ఎన్నో తెరలే.. అన్నీ దాటి మనసే.. ఎగిరిందే.. నన్నే నేను గెలిచే.. క్షణాలివే కనుకే..' అంటూ సాగిన ఈ పాట శ్రోతలను ఆకట్టుకుంటోంది. పవన్ సి.హెచ్ స్వరాలు సమకూర్చిన ఈ సాంగ్ కి భాస్కరభట్ల రవి కుమార్ సాహిత్యం అందించారు. సింగర్స్ జోనితా గాంధీ - నకుల్ అభ్యంకార్ కలిసి ఆలపించారు. ఈ వాన పాటలో సాయి పల్లవి - చైతూ డ్యాన్స్ ప్రత్యేకంగా నిలుస్తుందని తెలుస్తోంది. 'సారంగ దరియా' పాటలో సోలో గా స్టెప్పులేసిన సాయి పల్లవి.. ఈ రెయిన్ డ్యూయెట్ లో చైతూతో కలిసి అలరించనుంది. ఈ పాటకు శేఖర్ మాస్టర్ కొరియోగ్రఫీ చేశారు. విజయ్ సి.కుమార్ సినిమాటోగ్రఫీ అందించారు.

'లవ్ స్టోరీ' చిత్రాన్ని శ్రీ వెంకటేశ్వర సినిమాస్ ఎల్ఎల్పీ మరియు అమిగోస్ క్రియేషన్స్ సంస్థలు సంయుక్తంగా నిర్మించాయి. కె నారాయణదాస్ నారంగ్ - పి. రామ్మోహన్ రావు నిర్మాతలుగా వ్యవహరించారు. ఈ చిత్రంలో రాజీవ్ కనకాల - ఈశ్వరీ రావు - దేవయాని ఇతర కీలక పాత్రల్లో నటించారు. వచ్చే నెల 16న విడుదల కానున్న ఈ అందమైన ప్రేమ కావ్యం ఎలాంటి విజయాన్ని నమోదు చేస్తుందో చూడాలి.