మహేష్ చేతుల మీదుగా 'లవ్ స్టోరీ' నుంచి 'ఏవో ఏవో కలలే' సాంగ్..!

యువ సామ్రాట్ అక్కినేని నాగ‌చైత‌న్య - నేచురల్ బ్యూటీ సాయి పల్లవి జంటగా నటిస్తున్న రొమాంటిక్ ఎంటర్టైనర్ ''లవ్ స్టోరీ''. శేఖర్ కమ్ముల ఈ చిత్రానికి దర్శకత్వం వహిస్తున్నారు. సోనాలి నారంగ్ సమర్పణలో శ్రీ వెంకటేశ్వర సినిమాస్ మరియు అమిగోస్ క్రియేషన్స్ సంస్థలు సంయుక్తంగా ఈ చిత్రాన్ని నిర్మిస్తున్నాయి. నారాయణదాస్ కె నారంగ్ - పుష్కర్ రామ్మోహన్ రావ్ నిర్మాతలుగా వ్యవహరిస్తున్నారు. సమ్మర్ కానుకగా ఏప్రిల్ 16న ఈ చిత్రాన్ని ప్రేక్షకుల ముందుకు తీసుకురానున్నారు. ఈ నేపథ్యంలో ప్రచార కార్యక్రమాలు నిర్వహిస్తున్న చిత్ర యూనిట్.. 'లవ్ స్టోరీ' నుంచి మరో పాటను విడుదల చేయడానికి సన్నాహాలు చేస్తున్నారు.

ఈ అందమైన ప్రేమ కావ్యం నుంచి 'ఏవో ఏవో కలలే' అంటూ సాగే ఓ గీతాన్ని సూపర్ స్టార్ మహేష్ బాబు రేపు (మార్చి 25) ఉదయం గం.10.08 నిమిషాలకు రిలీజ్ చేస్తారని చిత్ర యూనిట్ తెలిపింది. ఈ సందర్భంగా ఓ బ్యూటిఫుల్ పోస్టర్ ని వదిలారు. ఇందులో చైతన్య - సాయి పల్లవి ఇద్దరూ వర్షంలో తడుస్తూ డ్యాన్స్ చేస్తూ కనిపిస్తున్నారు. ఈ సాంగ్ కు పవన్ సి.హెచ్ స్వరాలు సమకూర్చారు. ఇప్పటికే 'లవ్ స్టోరీ' నుంచి విడుదలైన 'ఏయ్ పిల్లా' 'నీ చిత్రం చూసి' 'సారంగ దరియా' పాటలు విశేష స్పందన తెచ్చుకున్నాయి. ఈ క్రమంలో మహేష్ చేతుల మీదుగా విడుదలవుతున్న 'ఏవో ఏవో కలలే' సాంగ్ శ్రోతలను ఎలా అలరిస్తుందో చూడాలి.