మెగా హీరోలలో బన్నీ - చెర్రీ తప్ప మిగతా ఎవరూ ఫార్మ్ లో లేరా..?

టాలీవుడ్ లో ఎన్ని సినీ ఫ్యామిలీలు ఉన్నా.. మెగా ఫ్యామిలీ హవా కాస్త ఎక్కువ కనిపిస్తుంది. మెగా హీరోలు ఎక్కువ మంది వున్నారు కాబట్టి.. మామూలుగానే యేడాది పొడవునా వారి సినిమాలు రిలీజ్ అవుతుంటాయి.. బాక్సాఫీస్ వద్ద డామినేషన్ కూడా అలానే వుంటుంది. అయితే గత కొంతకాలంగా మెగా హీరోలు ఫార్మ్ ని కోల్పోయినట్లు బాక్సాఫీస్ రిజల్ట్స్ ని బట్టి తెలుస్తోంది.

మెగా ఫ్యామిలీ బాస్, మెగాస్టార్ చిరంజీవి 'ఖైదీ నెం.150' సినిమాతో సాలిడ్ రీ ఎంట్రీ ఇచ్చారు. అయితే ఆ తర్వాత వచ్చిన 'సైరా నరసింహా రెడ్డి' చిత్రం పాన్ ఇండియా స్థాయిలో ఏమాత్రం ప్రభావం చూపించలేకపోయింది. పాండమిక్ కారణంగా ఆలస్యమైన 'ఆచార్య' చిత్రం డిజాస్టర్ గా నిలిచింది. ఇటీవల వచ్చిన 'గాడ్ ఫాదర్' సినిమా పాజిటివ్ టాక్ తెచ్చుకుని కూడా బ్రేక్ ఈవెన్ మార్క్ అందుకోలేకపోయింది.

మరోవైపు పవర్ స్టార్ పవన్ కళ్యాణ్ పరిస్థితి కూడా అలానే వుంది. 'వకీల్ సాబ్' చిత్రంతో తిరిగొచ్చిన పవన్.. బాక్సాఫీసు వద్ద ఆశించిన స్థాయిలో పెర్ఫార్మ్ చేయలేకపోయాడు. కారణాలు ఏవైనా ఈ రీమేక్ మూవీ బ్రేక్ ఈవెన్ కు కాస్త దూరంలోనే ఆగిపోయింది. దీని తర్వాత వచ్చిన 'భీమ్లా నాయక్' చిత్రం బ్లాక్ బస్టర్ టాక్ తెచ్చుకుని, బ్రేక్ ఈవెన్ సాధించలేదు.

మెగా ప్రిన్స్ వరుణ్ తేజ్ సోలోగా మంచి హిట్టు కొట్టి చాలా కాలమైంది. ఈ ఏడాది 'గని' వంటి డిజాస్టర్ చవిచూశాడు. సుప్రీం హీరో సాయి ధరమ్ తేజ్ కూడా వరుస విజయాలు అందుకోలేకపోతున్నాడు. 'రిపబ్లిక్' మూవీ విమర్శకుల ప్రశంసలు అందుకున్నప్పటికీ.. బాక్సాఫీస్ వద్ద నిరాశ పరిచింది.

మెగా మేనల్లుడు పంజా వైష్ణవ్ తేజ్ 'ఉప్పెన' తో బ్లాక్ బస్టర్ అందుకున్నప్పటికీ.. వెంటనే 'కొండ పొలం' చిత్రంతో ఫ్లాప్ రుచి చూశాడు. ఇటీవల వచ్చిన 'రంగ రంగ వైభవంగా' సినిమా కూడా భారీ పరాజయం పాలైంది. చాలా కాలంగా హిట్టు కోసం కష్ట పడుతున్న అల్లు శిరీష్ సైతం 'ఊర్వశివో రాక్షసివో' చిత్రంతో బ్రేక్ ఈవెన్ సాధించలేదు.

అయితే మెగా హీరోలలో ఐకాన్ స్టార్ అల్లు అర్జున్ మరియు మెగా పవర్ స్టార్ రామ్ చరణ్ మాత్రం తమ ఫార్మ్ ని కొనసాగిస్తున్నారు. వీరిద్దరూ ఒకరికొకరు పోటీగా నిలవడమే కాదు.. మిగితా టాలీవుడ్ స్టార్స్ కు గట్టి పోటీనిస్తున్నారు.

'అల వైకుంఠపురములో' సినిమాతో ఇండస్ట్రీ హిట్ సాధించిన బన్నీ.. 'పుష్ప: ది రైజ్' చిత్రంతో బ్లాక్ బస్టర్ అందుకున్నారు. ప్రస్తుతం పాన్ ఇండియా క్రేజ్ ని ఎంజాయ్ చేస్తున్న అల్లు అర్జున్.. ఇప్పుడు తన చిత్రాన్ని రష్యా లో ప్రమోట్ చేసే పనిలో బిజీగా ఉన్నారు. త్వరలో 'పుష్ప 2' సినిమాని సెట్స్ మీదకు తీసుకెళ్లనున్నాడు.

మరోవైపు రామ్ చరణ్ 'ఆర్. ఆర్. ఆర్' చిత్రంతో బిగ్గెస్ట్ బ్లాక్ బస్టర్ అందుకున్నారు. పాన్ ఇండియా స్థాయిలో క్రేజ్ ఏర్పరచుకోవడమే కాదు.. గ్లోబల్ ఆడియన్స్ దృష్టిని ఆకర్షించాడు. ప్రస్తుతం శంకర్ దర్శకత్వంలో ఓ భారీ సినిమా చేస్తున్నాడు. బుచ్చిబాబుతో ఓ సినిమా అనౌన్స్ చేసాడు.

ప్రస్తుతానికైతే మెగా హీరోలలో రామ్ చరణ్ మరియు అల్లు అర్జున్ మాత్రమే ఫార్మ్ లో ఉన్నారని చెప్పాలి. మరి రాబోయే రోజుల్లో మిగతా హీరోలు కూడా విజయాలు అందుకొని ట్రాక్ లోకి వస్తారేమో చూడాలి.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.