ఎంత ఘనంగా చేశామన్నది కాదు చిరు సార్

ఆయన సినిమాల్లో మెగా స్టార్. రాజకీయాల్లోనూ అడుగుపెట్టి ఓ పార్టీకి అధ్యక్షుడిగా ఉన్నారు. 18 మంది ఎమ్మెల్యే లకు నాయకత్వం వహించారు. కేంద్ర మంత్రిగానూ పనిచేశారు. ప్రస్తుతం ఎంపీగా కొనసాగుతున్నారు. ఇలాంటి నేపథ్యం ఉన్న వ్యక్తి 60వ పుట్టిన రోజంటే మాటలా? ఏర్పాటు కొంచెం గట్టిగానే సాగుతున్నాయి. ఇప్పటిదాకా ఎన్నడూ లేనంత ఘనంగా చిరంజీవి పుట్టిన రోజు వేడుకను ఈ నెల 22న నిర్వహించడానికి మెగా ఫ్యామిలీ భారీ ఏర్పాట్లు చేస్తోంది. రామ్ చరణ్ అండ్ కో ఈ వేడుకల్ని చాలా ప్రతిష్టాత్మకంగా తీసుకుంటోంది. అభిమానుల కోసం శిల్ప కళా వేదికలో ప్రత్యేక కార్యక్రమాలు ఏర్పాటు చేస్తున్నారు. మరోవైపు దేశవ్యాప్తంగా రాజకీయ, సినీ ప్రముఖులందరినీ ఆహ్వానించి పార్క్ హయత్ హోటల్ లో గ్రాండ్ లంచ్ ఏర్పాటు చేస్తోంది మెగా ఫ్యామిలీ.

అమితాబ్, రజనీకాంత్ సహా వివిధ ఇండస్ట్రీల సినీ ప్రముఖులు వేడుకలో సందడి చేయబోతున్నారు. రాజకీయ ప్రముఖుల సంఖ్య కొంచెం తక్కువే కానీ.. వాళ్లలోనూ మహామహులే వస్తారట. అంటే ఏర్పాట్లు ఘనంగానే ఉంటాయని.. ఆ రోజు దేశమంతా చిరంజీవి 60వ జన్మదినం గురించే మాట్లాడుకునేలా వేడుకలు సాగుతాయని తెలుస్తోంది. ఐతే ఈ వేడుకలంతా సరే కానీ.. చిరంజీవి తన 150వ సినిమా కబురు చెబుతారా లేదా అన్నదే డౌటు. గత ఏడాదే చిరు నుంచి ఈ ప్రకటన ఆశించారు అభిమానులు. ఏడాది కాలంలో ఎన్నెన్నో పరిణామాలు జరిగాయి. పూరి జగన్నాథ్ ను డైరెక్టర్ గా కన్ఫమ్ చేశారు కానీ.. సినిమా మాత్రం అనౌన్స్ చేయలేదు. ప్రస్తుత పరిణామాలు చూస్తుంటే ఈ పుట్టిన రోజుకు కూడా సినిమాను అనౌన్స్ చేయడంపై అనుమానాలు కలుగుతున్నాయి. వారం రోజులుగా తమిళ ‘కత్తి’ రీమేక్ లో చిరు నటిస్తారన్న ప్రచారం కూడా జరుగుతోంది. వచ్చే శుక్రవారం చిరు నుంచి 150వ సినిమా అనౌన్స్ మెంట్ ఉంటేనే జన్మదిన వేడుకలకు సార్థకత ఉంటుందని అభిమానులు భావిస్తున్నారు.