తెరమీదకు మరోసారి 'ఎక్సప్రెస్ రాజా' కాంబో..??

టాలీవుడ్ ఇండస్ట్రీలో ప్రస్తుతం ప్లాప్స్ ఎదుర్కొంటున్న హీరోలు ఎవరంటే ఖచ్చితంగా ఆ లిస్టులో శర్వానంద్ ఉంటాడు. 'శతమానం భవతి' సినిమా తర్వాత కమర్షియల్ మాత్రమే కాదు ఏ విధంగాను సూపర్ హిట్ అందుకోలేకపోయాడు. శతమానం భవతి తర్వాత ఇప్పటివరకు చేసినవన్నీ బోల్తాకొడుతూ వచ్చాయి. ఈ ఏడాది శ్రీకారం సినిమాతో వచ్చాడు. వ్యవసాయం నేపథ్యంలో తెరకెక్కిన ఈ మూవీ హైప్ బాగానే క్రియేట్ చేసుకుంది. కానీ కంటెంట్ పరంగా సినిమా రొటీన్ అయిపోవడంతో ప్రేక్షకుల ఆదరణకు దూరమైంది. ఈ మధ్యకాలంలో ఎంతటి మెసేజ్ ఓరియెంటెడ్ సినిమా అయినా జనాలకు వినోదం లేకపోతే చూడటం మానేశారు.

ఆ విధంగా శ్రీకారం బోల్తా కొట్టింది. అయితే ఈ హీరో సినిమాలు సీరియస్ గానే చేస్తున్నాడు. కానీ మూవీస్ సెలక్షన్ విషయంలో తప్పిదం జరిగిందేమో.. అందుకే వరుసగా ప్లాప్స్ ఖాతాలో వేసుకున్నాడని టాక్. ప్రస్తుతం శర్వాకు మంచి కమర్షియల్ హిట్ అవసరం ఎంతైనా ఉంది. కానీ త్వరలో శర్వా నుండి రాబోతున్న మహాసముద్రం సినిమా కూడా సీరియస్ డ్రామాగా తెరకెక్కుతోంది. ఈ జానర్ సీరియస్ డ్రామా సినిమాల్లో కథనం బిగువుగా లేకపోతే మాత్రం ప్రేక్షకులు ఫలితం ఎలాంటిది అందిస్తారో తెలిసిందే. ఇదిలా ఉండగా.. మహానుభావుడు తర్వాత మరోసారి కామిక్ రోల్ తో అలరించేందుకు సిద్ధం అవుతున్నాడు శర్వా.

రెడ్ ఫేమ్ కిషోర్ తిరుమల దర్శకత్వంలో 'ఆడాళ్ళు మీకు జోహార్లు' అనే సినిమా చేయనున్నాడు. ఈ సినిమాలో 'పెళ్లికాని ప్రసాద్' అనే రోల్ చేస్తున్నాడు. అయితే శ్రీకారం ఫలితం ఎలా ఉన్నప్పటికీ శర్వా మాత్రం వరుసగా సినిమాలు లైనప్ చేసుకుంటున్నాడు. ఆల్రెడీ ఆడాళ్ళు మీకు జోహార్లు ఉండగానే.. తదుపరి యూవి క్రియేషన్స్ బ్యానర్ లో మేర్లపాక గాంధీతో ఓ సినిమా చేయబోతున్నట్లు టాక్. ఇదివరకు గాంధీతో ఎక్సప్రెస్ రాజా సినిమా చేసాడు. అలాగే ఏకే ఎంటర్టైన్మెంట్స్ లో కూడా ఓ సినిమా ఉంటుందని సినీవర్గాలలో వినికిడి. ఆడాళ్ళు మీకు జోహార్లు సినిమాలో శర్వా నేషనల్ క్రష్ రష్మికతో స్క్రీన్ షేర్ చేసుకోబోతున్నాడు. చూడాలి మరి మళ్లీ సక్సెస్ ట్రాక్ లోకి వస్తాడేమో!