ఎక్స్ ప్రెస్ రాజా.. అంతా కుక్క గురించే

సంక్రాంతి రేసులోకి కాన్ఫిడెంటుగా దూకేశాడు ఎక్స్ ప్రెస్ రాజా. పెద్ద సినిమాలు బరిలో ఉన్నా పట్టుబట్టి రిలీజ్ చేస్తున్నారంటే ఆ సినిమా మీద దర్శక నిర్మాతలకున్న నమ్మకమేంటో అర్థం చేసుకోవచ్చు. ఐతే సంక్రాంతికి రాబోతున్న మూడు పెద్ద సినిమాల కథలేంటన్నది ఇప్పటికే జనాలకు తెలిసిపోయింది. స్వయంగా ఆ చిత్రాల హీరోలే కథలు విప్పేశారు. కానీ ‘ఎక్స్ ప్రెస్ రాజా’ గురించి జనాలకు ఓ ఐడియా లేదు. ఇది క్రైమ్ ఎలిమెంట్ మిక్స్ అయిన ఫన్నీ ఎంటర్ టైనర్ అన్న సంగతి ట్రైలర్ అదీ చూస్తేనే అర్థమవుతోంది కానీ.. అంతకుమించి అసలు పాయింట్ ఏంటన్నది మాత్రం వెల్లడించలేదు చిత్ర బృందం.

ఐతే యూనిట్ సభ్యుల నుంచి అందుతున్న సమాచారం ప్రకారం.. ఈ సినిమా కథ అంతా ఓ కుక్క చుట్టూ తిరుగుతుందట. కుక్క మీద సినిమా ఏంటి అనిపిస్తోందా? రైలు ప్రయాణం నేపథ్యంలో ‘వెంకటాద్రి ఎక్స్ ప్రెస్’ లాంటి సినిమా తీసి మెప్పించిన మేర్లపాక గాంధీ.. కుక్క చుట్టూ సినిమాను తిప్పి ఒప్పించలేడా? అందుకే సింపుల్ గా కుక్క మీద అని సినిమా తీసి పడేయడానికి కూడా లేదు. ఇందులో హీరోకు కుక్కలంటే భయమట. ఐతే హీరోయిన్ కు కుక్కలంటే పిచ్చి. తన ముద్దుల కుక్క తప్పిపోవడంతో ఆమెతో దాన్ని వెతికే పనిలో పడతాడు హీరో. ఆ తర్వాత ఒక్కో పాత్ర యాడ్ అవుతాయి. కుక్క మెడలో ఉన్న చైన్ లో డైమండ్స్ పొదిగి ఉండటంతో అందరూ దాని వెంట పడతారట. ఈ క్రమంలో కన్ఫ్యూజింగ్ కామెడీ బాగా వర్కవుటైందని సమాచారం. సంక్రాంతికి గ్యారెంటీగా హిట్టు కొట్టబోయే సినిమా ఇదని ఇండస్ట్రీ జనాలు అంటున్నారు. మరి వాళ్ల నమ్మకం నిజమవుతుందో లేదో తెలియాలంటే ఇంకో రెండు రోజులు ఆగాలి.