ప్రేక్షకులకు కావాల్సినంత వినోదాన్ని అందిస్తానంటున్న 'ఎఫ్ 3' బ్యూటీ..!

''కృష్ణగాడి వీర ప్రేమగాధ'' సినిమాతో హీరోయిన్ గా పరిచయమైన గార్జియస్ బ్యూటీ మెహ్రీన్ ఫిర్జాదా.. తొలి సినిమాతోనే మంచి విజయాన్ని అందుకొని అందరి దృష్టిని ఆకర్షించింది. ఈ క్రమంలో వరుస ఆఫర్స్ అందుకుంటూ.. వచ్చిన ప్రతీ అవకాశాన్ని సద్వినియోగం చేసుకుంటూ వస్తోంది.

'మహానుభావుడు' 'రాజా ది గ్రేట్' 'ఎఫ్ 2' వంటి సినిమాలు అమ్మడికి మంచి పేరు తెచ్చిపెట్టాయి. ప్రస్తుతం బ్లాక్ బస్టర్ డైరెక్టర్ అనిల్ రావిపూడి దర్శకత్వంలో 'ఎఫ్ 2' ప్రాంఛైజీలో తెరకెక్కిస్తోన్న ''ఎఫ్ 3" సినిమాలో మెహ్రీన్ ఫిర్జాదా ఒక హీరోయిన్ గా నటిస్తోంది.

అనిల్ రావిపూడి తన సినిమాల్లో సృష్టించే పాత్రలు వినోదానికి కేరాఫ్ అడ్రస్సులుగా అలరిస్తుంటాయి. అలా ప్రేక్షకులకు కావాల్సిన వినోదం పంచిన పాత్రల్లో బ్లాక్ బస్టర్ హిట్ 'ఎఫ్-2' లో మెహ్రీన్ పిర్జాదా చేసిన హానీ పాత్ర కూడా ముందు వరుసలో వుంటుంది.

అందులో హనీ మేనరిజం - అమాయకత్వం - అల్లరి ప్రేక్షకుల మనసుని దోచుకున్నాయి. అయితే ఇప్పుడు 'ఎఫ్-3' చిత్రంతో 'ఎఫ్ 2' లో హానీ పాత్రకు భిన్నంగా.. అంతకుమించిన వినోదం పంచబోతోంది మెహ్రీన్. ఈ చిత్రంలో ఆమె పాత్రని దర్శకుడు అద్భుతంగా డిజైన్ చేశారని తెలుస్తోంది.

'F 3' సినిమాలో మెహ్రీన్ పాత్రని మెచ్యూర్ అండ్ డిఫరెంట్ లేయర్స్ వున్న పాత్రగా పూర్తి వినోదాత్మకంగా రూపొందించారని సమాచారం. ఈ పాత్ర తన కెరీర్ లోనే ది బెస్ట్ ఎంటర్ట్రైనర్ రోల్ కాబోతుందని.. తనకు మంచి గుర్తింపు తెచ్చిపెడుతుందని మెహ్రీన్ నమ్మకంగా వున్నారు.

'ఎఫ్ 3' చిత్రాన్ని శ్రీ వెంకటేశ్వర క్రియేషన్స్ బ్యానర్ లో దిల్ రాజు సమర్పణలో శిరీష్ నిర్మిస్తున్నారు. హర్షిత్ రెడ్డి సహ నిర్మాత. ఇందులో విక్టరీ వెంకటేష్ - మెగా ప్రిన్స్ వరుణ్ తేజ్ హీరోలుగా నటిస్తుండగా.. వారికి జోడీగా తమన్నా భాటియా - మెహ్రీన్ నటిస్తున్నారు. సోనాల్ చౌహాన్ మరో హీరోయిన్ గా అలరించబోతుంది.

ప్రేక్షకులు ఎంతగానో ఎదురుచూస్తున్న ఈ చిత్రంలో స్టార్ హీరోయిన్ పూజా హెగ్డే ఓ స్పెషల్ సాంగ్ లో సందడి చేయబోతోంది. అలానే నటకిరీటి రాజేంద్ర ప్రసాద్ - సునీల్ - మురళీ శర్మ - వెన్నెల కిషోర్ - శ్రీకాంత్ అయ్యంగార్ - అన్నపూర్ణ - వై విజయ - ప్రగతి - థర్టీ ఇయర్స్ పృథ్వి తో పాటు మరికొందరు ప్రముఖ నటీనటులు ఇతర కీలక పాత్రలలో అలరించనున్నారు.

రాక్ స్టార్ దేవి శ్రీ ప్రసాద్ ఈ చిత్రానికి మ్యూజిక్ అందిస్తున్నారు. ఇప్పటికే ఈ చిత్రం నుంచి విడుదలైన 'F3' థీమ్ సాంగ్ చార్ట్ బస్టర్ గా నిలిచింది. అలాగే సెకెండ్ సింగిల్ 'ఊ.. ఆ.. ఆహా.. ఆహా..' పాట అన్ని వర్గాల ప్రేక్షకులని ఆకట్టుకొని సోషల్ మీడియాలో ట్రెండింగ్ లో వుంది.

సాయి శ్రీరామ్ సినిమాటోగ్రఫీ అందించగా.. తమ్మిరాజు ఎడిటర్ గా పని చేస్తున్నారు. ఎస్ కృష్ణ స్క్రిప్ట్ కోఆర్డినేటర్ గా వర్క్ చేయగా.. ఆది నారాయణ - నారా ప్రవీణ్ అదనపు స్క్రీన్ ప్లే అందిస్తున్నారు. సమ్మర్ కానుకగా మే 27న ప్రపంచ వ్యాప్తంగా ''ఎఫ్ 3'' సినిమా భారీ స్థాయిలో విడుదల కాబోతోంది.