అధికారికంగా 'ఎఫ్-3' విడుదల తేదీ ఖరారు.. ఎప్పుడంటే?

ప్రస్తుతం పరిశ్రమలో వరుస విజయాలతో దూసుకుపోతున్న టాలీవుడ్ డైరెక్టర్ ఎవరైనా ఉన్నారంటే అది అనిల్ రావిపూడి అనే చెప్పాలి. 2015లో దర్శకుడుగా మొదలైన అనిల్ ప్రయాణం.. మొన్నటి సరిలేరు నీకెవ్వరూ వరకు విజయవంతంగా సాగింది. పటాస్, సుప్రీం, రాజా ది గ్రేట్, ఎఫ్2 లతో పాటు గతేడాది సంక్రాంతి బరిలో 'సరిలేరు నీకెవ్వరూ' సినిమాతో మరో సూపర్ హిట్ ఖాతాలో వేసుకున్నాడు. ఓవైపు మాస్.. మరోవైపు క్లాస్ ప్రేక్షకులను అలరిస్తూనే టోటల్ ఫ్యామిలీ తన సినిమా చూడటానికి వచ్చేలా క్రేజ్ తెచ్చుకున్నాడు. తన ప్రతి సినిమాలో కామెడీ ప్రధానంగా తెరకెక్కిస్తూ ప్రేక్షకులను అలరిస్తున్న అనిల్.. ప్రస్తుతం ఎఫ్2 సీక్వెల్ ఎఫ్3 మూవీ సినిమా సిద్ధం చేస్తున్నాడు. 2019లో విక్టరీ వెంకటేష్, వరుణ్ తేజ్ లను కథానాయకులుగా.. తమన్నా, మెహరీన్ లను కథానాయికలుగా తెరకెక్కిన చిత్రం 'ఎఫ్2'. ఫన్ అండ్ ఫ్రస్ట్రేషన్ అంటూ సంక్రాంతి బరిలో విడుదలైన ఈ సినిమా మంచి విజయాన్ని అందుకొని ఆ ఏడాది పైసావసూల్ మూవీ అనిపించుకుంది.

ఫుల్ లెన్త్ కామెడీ ఎంటర్టైనర్ గా తెరకెక్కిన ఆ సినిమాకు సీక్వెల్ కూడా ఉంటుందని అప్పుడే ప్రకటించాడు. అయితే ప్రస్తుతం శరవేగంగా షూటింగ్ జరుపుకుంటున్న ఈ సినిమా ప్రేక్షకులలో భారీ అంచనాలను క్రియేట్ చేసింది. దిల్ రాజు ఈసారి బడ్జెట్ విషయంలో రాజీపడకుండా సినిమాను నిర్మిస్తున్నాడట. అయితే ఎఫ్3 అంటే ఫన్ అండ్ ఫ్రస్ట్రేషన్ తో పాటు ఈసారి ఫ్యామిలీ అనే ఎమోషన్ యాడ్ చేశారు దర్శకనిర్మాతలు. ఇక ఇప్పటికే న్యూలుక్, ఫస్ట్ లుక్ అంటూ పోస్టర్లతో బజ్ క్రియేట్ చేసిన అనిల్ రావిపూడి.. ఈసారి ఏకంగా విడుదల తేదీని ప్రకటించి సర్ప్రైజ్ ఇచ్చారు. ఈ ఏడాది ఆగష్టు 27న ఎఫ్3 సినిమాను విడుదల చేస్తున్నట్టు అధికారికంగా ప్రకటించారు మేకర్స్. ఈ వార్త తెలిసి అటు వెంకీ, వరుణ్ ఫ్యాన్స్ తో పాటు తమన్నా ఫాన్స్ కూడా ఖుషి అవుతున్నారు. చూడాలి మరి ఎఫ్3 టీమ్ ఈసారి ఎలాంటి మేజిక్ చేస్తారో!