'ఎఫ్ 3' షూటింగ్ ప్రారంభం.. మళ్ళీ నవ్వులు మొదలు..!

విక్టరీ వెంకటేష్ - వరుణ్ తేజ్ హీరోలుగా డైరెక్టర్ అనిల్ రావిపూడి తెరకెక్కిస్తున్న ఫ్యామిలీ అండ్ కామెడీ ఎంటర్టైనర్ ''ఎఫ్ 3''. బ్లాక్ బస్టర్ 'ఎఫ్ 2: ఫన్ అండ్ ఫస్ట్రేషన్' ఫ్రాంచైజీలో ఈ సినిమా రూపొందుతోంది. ఇప్పటికే మెజారిటీ భాగం షూటింగ్ పూర్తి చేసుకున్న ఈ సినిమా కోసం మైసూర్ లో ఓ షెడ్యూల్ ప్లాన్ చేశారు. అయితే కోవిడ్ సెకండ్ వేవ్ నేపథ్యంలో ఆగిపోయింది. ఇప్పుడు పరిస్థితులు చక్కబడటంతో ఈ చిత్రాన్ని తిరిగి ప్రారంభించారు.

ఈరోజు శుక్రవారం హైదరాబాద్ లో 'ఎఫ్ 3' షూటింగ్ రీస్టార్ట్ చేసినట్లు చిత్ర బృందం తెలిపింది. సెట్స్‌ లో కోవిడ్ నిబంధనలు పాటిస్తూ తగు జాగ్రత్తలతో చిత్రీకరణ చేస్తున్నారు. వెంకటేశ్‌ - వరుణ్‌ తేజ్‌ లతో పాటుగా మిగిలిన ప్రధాన తారాగణం పాల్గొనే సన్నివేశాలను ఈ షెడ్యూల్ లో పూర్తి చేయనున్నారు. ఈ సందర్భంగా డైరెక్టర్ అనీల్ రావిపూడి ట్వీట్ చేస్తూ.. చిత్ర యూనిట్ తో కలిసి ఉన్న ఫోటోలను షేర్ చేశాడు. ''నా ఫేవరేట్ కోబ్రాస్ తో తిరిగి షూటింగ్ ప్రారంభించాం. మెల్లగా మళ్ళీ నవ్వులు మొదలు'' అని అనిల్ పేర్కొన్నారు. 'లవ్లీ టీమ్‌ తో మళ్ళీ వర్క్ మొదలుపెట్టాం' అని వరుణ్ తేజ్ ట్వీట్ చేశారు.

2019లో సంక్రాంతికి విడుదలైన 'ఎఫ్ 2' బ్లాక్‌ బస్టర్‌ హిట్‌ గా నిలిచింది. ఇప్పుడు మరింత ఫన్ ని జత చేసి 'ఎఫ్ 3' చిత్రాన్ని రూపొందిస్తున్నారు. మిల్కీ బ్యూటీ తమన్నా భాటియా - మెహ్రీన్ హీరోయిన్లుగా నటిస్తున్నారు. బాలీవుడ్ నటుడు బొమన్ ఇరానీ - సునీల్ కీలక పాత్రలు పోషిస్తున్నారు. ఈ చిత్రానికి రాక్ స్టార్ దేవిశ్రీ ప్రసాద్ సంగీతం సమకూరుస్తున్నారు. సాయి శ్రీరామ్ సినిమాటోగ్రఫీ అందిస్తున్నారు. ఏఎస్ ప్రకాష్ ఆర్ట్ డైరెక్టర్ గా వ్యవహరిస్తుండగా.. తమ్మిరాజు ఎడిటింగ్ వర్క్ చేస్తున్నారు. శ్రీ వెంకటేశ్వర క్రియేషన్స్‌ బ్యానర్‌ పై దిల్ రాజు - శిరీష్ ఈ చిత్రాన్ని నిర్మిస్తున్నారు.