అవన్నీ గాలి వార్తలే..!

స్టార్ హీరోయిన్ సమంతతో విడాకుల అనంతరం అక్కినేని నాగచైతన్య మరో హీరోయిన్‌ తో డేటింగ్‌ లో ఉన్నాడంటూ గత రెండు రోజులుగా పుకార్లు షికార్లు చేస్తున్న విషయం తెలిసిందే. తెలుగమ్మాయి, 'గూఢచారి' ఫేమ్ శోభిత ధూళిపాళతో చైతూ డేటింగ్ చేస్తున్నాడంటూ బాలీవుడ్ మీడియాలో వార్తలు రావడం ఇండస్ట్రీలో చర్చనీయాంశంగా మారింది. అంతర్గత నివేదికల ప్రకారం ఈ డేటింగ్ రూమర్స్ నిజం కాదని తెలుస్తోంది.

బాలీవుడ్ మీడియా కథనాల ప్రకారం, 'మేజర్' ప్రమోషన్ల సమయంలో శోభిత ను కలిసేందుకు ఆమె బస చేసిన హోటల్‌ కు నాగ చైతన్య చాలాసార్లు వెళ్లాడట. అలానే హైదరాబాద్‌ లోని చై కొత్త ఇంట్లో ఇద్దరూ కనిపించారని.. ఒకే కారులో బయటకు వెళ్లారని పేర్కొన్నారు. అయితే ఈ పుకార్లు నిరాధారమైనవని తెలుస్తోంది.

నాగ చైతన్య లేదా శోభిత ఇంకా డేటింగ్ పుకార్లను ఖండించనప్పటికీ.. అవన్నీ గాలి వార్తలే అని.. ఇద్దరూ మంచి స్నేహితులు మాత్రమే అని ఇన్ సైడ్ వర్గాలు వెల్లడించాయి. 'గూడాచారి' తర్వాత శోభిత అక్కినేని ఫ్యామిలీతో సన్నిహిత బంధాన్ని కలిగి ఉందని.. చైతన్యతో పరిచయం కూడా ఇందులో భాగమని అంటున్నారు. అంతేకానీ ఇప్పుడు వినిపిస్తున్న డేటింగ్ వార్తలు ఏమాత్రం నిజం కాదని చెబుతున్నారు.

డేటింగ్ రూమర్లు అనేవి నటీనటులకు, సినీ పరిశ్రమకు కొత్తేమీ కాదు. చైతూ విషయంలోనే ఇప్పటికే ఇద్దరు ముగ్గురు హీరోయిన్ల పేర్లు వినిపించాయి. సమంత తో కొన్నేళ్ళు డేటింగ్ చేసి పెళ్లి చేసుకోవడంతో అన్నిటికీ ఫుల్ స్టాప్ పడింది. వీరిద్దరూ విడాకులు తీసుకోవడంతో చైతన్య పై ఇప్పుడు మళ్లీ డేటింగ్ రూమర్స్ పుట్టుకొచ్చాయి. కానీ అవి నిజం కాదని తెలుస్తోంది.

డివోర్స్ ప్రకటన తర్వాత నాగచైతన్య ఒంటరి జీవితాన్ని గడుపుతున్నారు. కెరీర్ మీదనే ఫుల్ ఫోకస్ పెట్టి వరుసగా సినిమాలు చేస్తున్నారు. 'థ్యాంక్యూ' మూవీ వచ్చే నెలలో విడుదల కానుంది. అలానే ఆమిర్ ఖాన్ తో కలిసి నటించిన హిందీ సినిమా 'లాల్ సింగ్ చద్దా' ఆగస్ట్ లో ప్రేక్షకుల ముందుకు రానుంది.

తమిళ దర్శకుడు వెంకట్ ప్రభు దర్శకత్వంలో ఓ ద్విభాషా చిత్రంలో నటిస్తున్న చై.. విక్రమ్ కె కుమార్ తో కలిసి అమెజాన్ ప్రైమ్ వీడియో కోసం 'దూత' అనే హారర్ వెబ్ సిరీస్ చేస్తున్నారు. దీని తర్వాత 'సర్కారు వారి పాట' దర్శకుడు పరశురామ్ తో చైతూ ఓ ప్రాజెక్ట్ చేస్తారు.

మరోవైపు వైజాగ్ బ్యూటీ శోభిత ధూలిపాళ్ల హీరోయిన్‌ గా ఇప్పుడిప్పుడే నిలదొక్కుకుంటోంది. 'కురూప్' చిత్రంతో మెప్పించిన శోభిత.. లేటెస్టుగా 'మేజర్' తో మంచి విజయాన్ని సొంతం చేసుకుంది. ప్రస్తుతం మణిరత్నం దర్శకత్వంలో ప్రతిష్టాత్మకంగా తెరకెక్కుతోన్న 'పొన్నియన్ సెల్వన్' మూవీలో శోభిత ధూళిపాళ ఓ కీలక పాత్రలో నటిస్తోంది. దీంతో పాటుగా హిందీ - ఇంగ్లీష్ భాషల్లో రెండు ప్రాజెక్ట్స్ చేస్తోందని సమాచారం.