పవర్ స్టార్ ఇమేజ్ కి తగ్గ కంటెంట్ వదలండి మాస్టారూ..!

పవర్ స్టార్ పవన్ కళ్యాణ్ సినిమాల్లోకి రీ ఎంట్రీ ఇచ్చిన తర్వాత వరుస పెట్టి సినిమాలు చేసేస్తున్నాడు.. ముందుగా వేణు శ్రీరామ్ దర్శకత్వంలో 'వకీల్ సాబ్' చిత్రాన్ని స్టార్ట్ చేసిన పవన్.. వెంటనే క్రిష్ జాగర్లమూడి దర్శకత్వంలో 'హరి హర వీరమల్లు' సినిమాని సెట్స్ పైకి తీసుకెళ్లాడు. ఇదే క్రమంలో సాగర్ కె. చంద్ర దర్శకత్వంలో 'అయ్యప్పనుమ్ కొశీయుమ్' రీమేక్ సినిమాని ప్రారంభించి అందరిని షాక్ కి గురి చేశాడు. అలానే త్వరలో డైరెక్టర్ హరీష్ శంకర్ తో సినిమా.. సురేందర్ రెడ్డి డైరెక్షన్ లో ఓ మూవీ చేయనున్నాడు. అయితే పవర్ స్టార్ ఇలా బ్యాక్ టూ బ్యాక్ సినిమాలు చేస్తుండటంతో ఖుషీగా ఉన్న ఫ్యాన్స్.. అన్నిటికంటే ముందుగా థియేటర్లలోకి వస్తున్న 'వకీల్ సాబ్' పై పెద్దగా బజ్ లేకపోవడంపై కలవరపడుతున్నారని తెలుస్తోంది.

'పింక్' రీమేక్ గా తెరకెక్కుతున్న 'వకీల్ సాబ్' సినిమా షూటింగ్ పూర్తి చేసుకుని ఏప్రిల్ 9న విడుదలకు సిద్ధంగా ఉంది. అంటే రిలీజ్ కి ఇంకా నెల కూడా లేదు. అయినప్పటికీ ఎందుకో మరి ఎక్కడా వకీల్ సాబ్ హడావిడి కనిపించడం లేదు. మరోవైపు వచ్చే ఏడాది సంక్రాంతికి రానున్న 'హరి హర వీరమల్లు' ఇప్పటి నుంచే సందడి చేస్తోంది. తాజాగా విడుదలైన పవన్ ఫస్ట్ లుక్ ని ఫ్యాన్స్ ఫిదా అయ్యారు. ఈ సినిమా టాకీ పార్ట్ జూన్ చివరకు కంప్లీట్ అవుతుందని సమాచారం. అలానే త్రివిక్రమ్ దర్శకత్వ పర్యవేక్షణ చేస్తున్న 'ఏకే' రీమేక్ షూటింగ్ కూడా శరవేగంగా జరుగుతోంది. దీనికి సంబంధించిన పిక్స్ ఎప్పటికప్పుడు బయటకు వస్తూ సినిమాపై అంచనాలు పెంచేస్తున్నాయి. ఇలా మిగతా సినిమాలపై క్రియేట్ అయిన బజ్ 'వకీల్ సాబ్' పై అంతగా లేదనే టాక్ వినిపిస్తోంది. పవన్ ఇమేజ్ ని మ్యాచ్ చేసే కంటెంట్ తో ప్రమోట్ చేయకపోవడం వల్లనో.. ఆల్రెడీ అందరికీ తెలిసిన రీమేక్ అనో ఈ సినిమా జనాల్లోకి వెళ్లడం లేదని అనుకుంటున్నారు. మేకర్స్ ఇప్పటి నుంచైనా ప్రమోషన్స్ స్పీడ్ పెంచి 'వకీల్ సాబ్' పై ప్రేక్షకుల్లో ఆసక్తిని కలిగించాలని పీకే ఫ్యాన్స్ కోరుకుంటున్నారు.