దగ్గుబాటి హీరోల మల్టీస్టారర్ సెట్ అయ్యేనా..?

తమ అభిమాన ఫ్యామిలీ హీరోలు ఒకే సినిమాలో స్క్రీన్ షేర్ చేసుకుంటే చూడాలని ఫ్యాన్స్ కోరుకుంటుంటారు. ప్రస్తుతం టాలీవుడ్ ని ఏలుతున్న మెగా ఫ్యామిలీ - అక్కినేని ఫ్యామిలీ - నందమూరి ఫ్యామిలీ - ఘట్టమనేని ఫ్యామిలీ - మంచు ఫ్యామిలీ.. ఇలా ప్రతి కుటుంబంలో హీరోలు కలిసి నటించారు. అయితే దగ్గుబాటి హీరోలు మాత్రం ఇంతవరకు ఫుల్ లెంత్ సినిమాలో కలిసి నటించలేదు. 'మనం' సినిమాలో అక్కినేని మూడు తరాల హీరోలైన నాగేశ్వరరావు - నాగార్జున - నాగచైతన్య - అఖిల్ లు కలిసి నటించి ప్రేక్షకులను మెప్పించారు. నందమూరి ఫ్యామిలీలో ఎన్టీఆర్ - బాలకృష్ణ కలిసి పలు సినిమాల్లో నటించారు. అలానే బాలయ్య - కళ్యాణ్ రామ్ కలిసి స్క్రీన్ షేర్ చేసుకున్నారు.

మెగాస్టార్ చిరంజీవి - రామ్ చ‌ర‌ణ్ క‌లిసి 'ఆచార్య' సినిమాలో న‌టిస్తున్న సంగతి తెలిసిందే. ఇక మంచు హీరోలందరూ 'పాండవులు పాండవులు తుమ్మెద' అనే సినిమాలో కలిసి నటించి సందడి చేశారు. ఈ నేపథ్యంలో దగ్గుబాటి వెంకటేష్ - రానా కాంబినేషన్ లో కూడా ఓ సినిమా వస్తే బాగుంటుందని ఫ్యాన్స్ ఎప్పటి నుంచో ఎదురు చూస్తున్నారు. రానా హీరోగా నటించిన 'కృష్ణం వందే జగద్గురుమ్' సినిమాలో వెంకీ ఓ సాంగ్ లో కనిపించి అలరించాడు. అప్పటి నుంచి బాబాయ్‌ - అబ్బాయ్‌ కాంబినేషన్‌ లో పూర్తి స్థాయి సినిమా కోసం అభిమానులు ఆతృతగా ఎదురుచూస్తున్నారు. నిజానికి మూవీ మొఘల్ రామానాయుడు వెంకీ - రానా లతో ఓ సినిమా చేయాలని ప్రయత్నాలు చేశారు కానీ అది వర్కౌట్ కాలేదు. ఆ మధ్య ఇద్దరూ కలిసి సినిమా చేస్తున్నారని వార్తలు వచ్చినప్పటికీ కార్యక్రమం దాల్చలేదు. ఇటీవల ఓ ఇంటర్వ్యూలో మాట్లాడిన రానా వీరి కాంబోలో మల్టీస్టారర్ చర్చల దశలో ఉందని.. సరైన స్క్రిప్ట్ కుదిరిన వెంటనే కలిసి నటిస్తామని పేర్కొన్నాడు. ఈ నేపథ్యంలో త్వరలోనే దగ్గుబాటి హీరోల మల్టీస్టారర్ సెట్ అవుతుందేమో చూడాలి.