'వకీల్ సాబ్' నుంచి ఏదైనా అప్డేట్ ఇవ్వండి సారూ..!

పవర్ స్టార్ పవన్ కళ్యాణ్ చాలా గ్యాప్ తరువాత వెండితెరపై కనిపించనున్న చిత్రం ''వకీల్ సాబ్''. 'పింక్‌' చిత్రానికి రీమేక్‌ గా తెరకెక్కుతోన్న ఈ సినిమాకి వేణు శ్రీరామ్ దర్శకత్వం వహిస్తున్నారు. బోనీ కపూర్ సమర్పణలో శ్రీ వెంకటేశ్వర క్రియేషన్స్ బ్యానర్‌ పై దిల్ రాజు - శిరీష్ - హర్షిత్ రెడ్డి కలిసి ఈ చిత్రాన్ని నిర్మిస్తున్నారు. పవన్ లాయర్ గా నటిస్తున్న ఈ చిత్రం కోసం మెగా అభిమానులు కళ్ళు కాయలు కాసేలా ఎదురు చూస్తున్నారు. చివరి దశకు చేరుకున్న 'వకీల్ సాబ్' షూటింగ్ కోవిడ్ నేపథ్యంలో తిరిగి ప్రారంభమైంది. పవన్ కూడా కొన్ని రోజులు చిత్రీకరణలో పాల్గొని కాస్త విరామం తీసుకున్నాడు. అయితే వకీల్ సాబ్ నుంచి పవన్ కళ్యాణ్ బర్త్ డే కి వచ్చిన టీజర్ తప్ప మరో అప్డేట్ లేదు. ఈ నేపథ్యంలో పవర్ స్టార్ మూవీ నుంచి ఏదైనా కొత్త పబ్లిసిటీ మెటీరియల్ అయినా రిలీజ్ చేస్తే బాగుంటుందని ఫ్యాన్స్ గ్రూప్స్ లో చర్చలు జరుగుతున్నాయి.

నిజానికి 'వ‌కీల్ సాబ్' చిత్రాన్ని సమ్మర్ లో విడుదల చేయాలని మేకర్స్ ప్లాన్ చేసుకున్నారు. అయితే కరోనా మహమ్మారి వచ్చి అన్నీ తారుమారు చేసింది. ఇప్పుడిప్పుడే థియేటర్స్ తెరుస్తుండటంతో 'వకీల్ సాబ్' ని సంక్రాంతి బరిలో నిలపనున్నారని వార్తలు వచ్చాయి. కానీ ఇంతవరకు రిలీజ్ డేట్ మీద అప్డేట్ ఇవ్వలేదు. దీంతో పవన్ ఫ్యాన్స్ 'వకీల్ సాబ్' గురించి అప్డేట్ ఇవ్వాలని కోరుతున్నారు. కనీసం హీరోయిన్లు ఎవరో అనేది కూడా ఇంతవరకు అధికారికంగా చెప్పకపోవడంతో మెగా ఫ్యాన్స్ తీవ్ర నిరాశలో ఉన్నారని తెలుస్తోంది. మరి అభిమానుల రిక్వెస్ట్ ని పరిగణనలోకి తీసుకుని త్వరలోనే వకీల్ సాబ్ గురించి ఏదైనా కొత్త విషయం చెప్తారేమో చూడాలి.