మళయాళంలో ఫిదా చేయబోతున్నారు

దర్శకుడిగా శేఖర్ కమ్ములకు బ్రహ్మాండమైన కీర్తిప్రతిష్ఠలు తెచ్చిపెట్టిన చిత్రం హ్యాపీడేస్. ఈ సినిమా కమర్షియల్ గా సూపర్ హిట్టవడమే కాదు.. అందులో నటించిన వారందరికీ మంచి బ్రేక్ నిచ్చింది. ఈ సినిమాతోనే తమన్నాకు ఇండస్ట్రీలో మంచి గుర్తింపు వచ్చింది. హ్యాపీడేస్ కేవలం తెలుగు ప్రేక్షకులనే కాదు... మళయాళ ప్రేక్షకులను కూడా చాలా బాగా ఆకట్టుకుంది. ఆ సినిమా మళయాళ వెర్షన్ సూపర్ హిట్టయింది.

శేఖర్ కమ్ముల ఈ మధ్య కమర్షియల్ హిట్ కు దూరమై చివరకు ఫిదా సినిమాతో మళ్లీ తన సత్తా నిరూపించుకున్నాడు. వరుణ్ తేజ్ - సాయి పల్లవి జంటగా నటించిన ఈ సినిమా అందరినీ ఫిదా చేసింది. ఇప్పుడు ఇదే సినిమాను మళయాళంలో అదే పేరుతో డబ్బింగ్ చేసి రిలీజ్ చేయబోతున్నారు. తాజాగా ట్రయిలర్ రిలీజ్ చేశారు. ప్రం ద డైరెక్టర్ ఆఫ్ హ్యాపీడేస్ అన్న టైటిల్ తో అక్కడి ప్రేక్షకులను ఆకట్టుకునే ప్రయత్నం చేశారు. సాయిపల్లవి మళయాళంలో ఓ రకంగా టాప్ హీరోయిన్ అని చెప్పాలి. ప్రేమమ్ సినిమాలో మలర్ పాత్రను మళయాళ ప్రేక్షకులను ఇప్పట్లో మర్చిపోరు. ఫిదాకు ఆమే హీరోయిన్ కావడం మరింత ప్లస్ పాయింట్. ఈ సినిమా మళయాళ రైట్స్ ప్రొడ్యూసర్ దిల్ రాజు వేరేవరికీ ఇవ్వకుండా తనే డబ్బింగ్ చేయించారు.

మెగా హీరో అల్లు అర్జున్ కు మళయాళం విపరీతమైన ఫ్యాన్ ఫాలోయింగ్ ఉంది. అక్కడి యూత్ అతడిని ప్రేమగా మల్లు అర్జున్ అని పిలుచుకుంటారు. రామ్ చరణ్ కు కూడా చెప్పుకోదగ్గ స్థాయిలో అభిమానులు ఉన్నారు. ఇప్పుడు అదే బాటలో వరుణ్ తేజ్ వెళ్తున్నాడు. ఫిదా మళయాళ వెర్షన్ అక్కడి ప్రేక్షకులను ఆకట్టుకుంటే అతడి మార్కెట్ కూడా పెరిగే అవకాశం ఉంటుంది. మొత్తానికి మెగా యూత్ హీరోలంతా మళయాళం ప్రేక్షకులను బాగానే మెప్పిస్తున్నారు.