ఉపేంద్ర‌తో ఆర్జీవీ చేస్తున్న సినిమా ఏంటీ?

తెలుగులో ఏ క‌థ దొరికితే ఆ క‌థ‌ని సినిమాగా మ‌లుస్తూ త‌న‌పై వున్న క్రేజ్ ని పూర్తిగా త‌గ్గించుకున్నాడు రామ్ గోపాల్ వ‌ర్మ‌. ఎంత‌లా అంటే ఆయ‌న‌తో క‌లిసి క్రేజీ స్టార్ సినిమా చేస్తున్నార‌న్నా జ‌నం ప‌ట్టించుకోనంత‌. ఇటీవ‌లే కొండా ముర‌ళి జీవిత క‌థ ఆధారంగా `కొండా` చిత్రాన్ని చుట్టేసిన ఆర్జీవి తాజాగా క‌న్న‌డ స్టార్ ఉపేంద్ర‌తో ఓ యాక్ష‌న్ డ్రామాకు శ్రీ‌కారం చుట్టారు. ఈ వార్త ఇండ‌స్ట్రీ వ‌ర్గాల‌తో పాటు సామాన్య సినీ అభిమానిని ఆశ్చ‌ర్యానికి గురిచేసింది.

హీరో ఉపేంద్ర 53వ పుట్టిన రోజు సంద‌ర్భంగా రామ్ గోపాల్ వర్మ త‌న‌తో ఓ సినిమా చేయ‌బోతున్నానంటూ ప్ర‌క‌టించి షాకిచ్చాడు. అన్న‌ట్టుగానే సినిమాని ప్రారంభించేశాడు. ఇద్దు విభిన్న‌మైన వ్య‌క్తులు క‌లిసి సినిమా చేయ‌బోతున్నార‌న‌గానే కొంత మంది ఆశ్చ‌ర్యాన్ని వ్య‌క్తం చేస్తే మ‌రి కొంత మంది ఆస‌క్తిగా ఎదురుచూడ‌టం మొద‌లుపెట్టారు. వీరిద్ద‌రు క‌లిసి ఎలాంటి సినిమా చేయ‌బోతున్నారా? అన్న‌ది ఇప్పుడు ఆస‌క్తిక‌రంగా మారింది.

అంద‌రి ఊహ‌ల్ని నిజం చేస్తూ వ‌ర్మ మ‌ళ్లీ డీ కంప‌నీ త‌ర‌హా క‌థ‌తో తాజాగా ఉపేంద్ర కీల‌క పాత్ర‌లో ఓ మూవీని చేస్తున్నారు. గురువారం దీనికి సంబంధించిన మోష‌న్ టీజ‌ర్ ని షోష‌ల్ మీడియా ట్వీట్ట‌ర్ వేదిక‌గా విడుద‌ల చేశారు. రాజ‌మౌళి ట్రిపుల్ ఆర్ విడుద‌ల‌వుతున్న వేళ వ‌ర్మ త‌న తాజా చిత్రానికి `R` అనే టైటిల్ ని ఫిక్స్ చేయ‌డం ఆస‌క్తిక‌రంగా మారింది. బెంగ‌ళూరులో హ‌ల్ చ‌ల్ సృష్టించిన `R` గ్యాంగ్ దుబాయ్ లో వున్న దీ కంప‌నీ అధినేత, అండ‌ర్ వ‌ర‌ల్డ్ డాన్ దావూద్ ఇబ్ర‌హీంని కూడా వ‌ణికించింద‌ట‌.

అలాంటి `R` పాత్ర‌లో క‌న్న‌డ స్టార్‌ ఉపేంద్ర న‌టిస్తున్నారు. గురువారం ఈ చిత్రానికి సంబంధించిన మోష‌న్ టీజ‌ర్‌ని విడుద‌ల చేసిన వ‌ర్మ `R` ఓ గ్యాంగ్ స్ట‌ర్ లా కాకుండా చిన్న టైమ్ స్ట్రీట్ ఫైట‌ర్ గా ప్రారంభించి ఆపై బెంగ‌ళూరులోనే కాకుండా ముంబైలోని మాఫియాను, దుబాయ్ లో వున్న డీ కంపెనీని కూడా భ‌య‌భ్రాంతుల‌కు గురిచేశాడ‌ట‌. అలాంటి హ‌డ‌లెత్తించిన‌ `R` పాత్ర‌లో ఉపేంద్ర న‌టిస్తున్నాడ‌ని వ‌ర్మ ట్వీట్ చేశాడు.