సుశాంత్‌ కేసులో మొదటి అరెస్ట్‌

బాలీవుడ్‌ హీరో సుశాంత్‌ సింగ్‌ రాజ్‌ పూత్‌ మరణంపై ఉన్న అనుమానాలు నివృత్తి చేసేందుకు సీబీఐ ఎంక్వౌరీ జరుగుతోంది. సుశాంత్‌ ప్రియురాలు మరియు ఆమె కుటుంబ సభ్యులను సీబీఐ ప్రధానంగా ఎంక్వౌరీ చేస్తోంది. ఈ క్రమంలోనే డ్రగ్స్‌ వ్యవహారం బయటకు వచ్చింది. రియాకు డ్రగ్స్‌ డీలర్‌ తో సంబంధం ఉందని అతడితో రియా పలు సార్లు మాట్లాడినట్లుగా సీబీఐ గుర్తించింది. దాంతో రంగంలోకి దిగిన ఎన్‌ సీ బీ అధికారులు డ్రగ్స్‌ డీలర్‌ లను పట్టుకోవడంతో పాటు రియాను కూడా ప్రశ్నించారు.

రియా సోదరుడు శోవిక్‌ చక్రవర్తిని ఎన్‌ సీ బీ అధికారులు ప్రశ్నించగా ఆశ్చర్యకర విషయాలు బయటకు వచ్చాయి. సుశాంత్‌ కు డ్రగ్స్‌ అలవాటు ఉందని.. అతడి కోసం రియా డ్రగ్స్‌ కావాలని నన్ను అడిగేది అంటూ శోవిక్‌ చెప్పుకొచ్చాడు. సుశాంత్‌ కు రియా డ్రగ్స్‌ సరఫరా చేసేది అంటూ అతడి మాటలతో క్లారిటీ వచ్చింది. ఆ కారణంగానే శోవిక్‌ పలువురు డ్రగ్స్‌ డీలర్లతో మాట్లాడాను అంటూ ఒప్పుకున్నాడు. దాంతో అతడిని పోలీసులు అరెస్ట్‌ చేశారు.

సుశాంత్‌ మరణంకు సంబంధించి కూడా సీబీఐ వారు అతడిని ఎంక్వౌరీ చేశారు. ఎట్టకేలకు సుశాంత్‌ కేసులో ఒకరు అరెస్ట్‌ అవ్వడంతో అభిమానులు ఒకింత హర్షం వ్యక్తం చేస్తున్నారు. కొందరు మాత్రం మొదట రియాను అరెస్ట్‌ చేయాలంటూ సోషల్‌ మీడియా ద్వారా డిమాండ్‌ చేస్తున్నారు. సుశాంత్‌ మృతి కేసు ఇప్పటికే చాలా మలుపులు తిరిగింది. శోవిక్‌ అరెస్ట్‌ తో కొత్త మలుపు తిరిగినట్లయ్యింది. ముందు ముందు సుశాంత్‌ కేసులో ఎలాంటి నిజాలు తెలుస్తాయో చూడాలి.