ఫస్ట్ లుక్: 'సింగం' దర్శకుడు నుంచి వస్తోన్న ''ఏనుగు''

కోలీవుడ్ ఊర మాస్ డైరెక్టర్ హరి.. తెలుగులోనూ మంచి క్రేజ్ ఏర్పరచుకున్నాడు. 'సింగం' సిరీస్ లతో హరి ఇక్కడ కూడా వరుసగా బ్లాక్ బస్టర్స్ అందుకున్నారు. ఇప్పుడు మొదటిసారిగా హీరో అరుణ్ విజయ్ తో హరి ఓ సినిమా తీసేందుకు రెడీ అయ్యారు. తెలుగు, తమిళ భాషల్లో రూపొందిస్తున్న ఈ బైలింగ్వల్ మూవీకి ''ఏనుగు'' అనే ఆసక్తికరమైన టైటిల్ ను ఖరారు చేశారు. వినాయక చవితి సందర్భంగా ఈ చిత్రానికి సంబంధించిన ఫస్ట్ లుక్ ను కూడా విడుదల చేశారు.

పలు ఇండస్ట్రీలకు చెందిన 33 మంది సెలెబ్రిటీలు ఒకేసారి ''ఏనుగు'' ఫస్ట్ లుక్ ను రిలీజ్ చేయడం విశేషం. ఈ పోస్టర్ విషయానికొస్తే.. ఇందులో వినాయకుడి విగ్రహాన్ని పట్టుకుని అరుణ్ విజయ్ డిఫరెంట్ లుక్ లో కనిపిస్తున్నారు. తెల్లటి దుస్తుల్లో మెరిసిపోతూ.. కట్టలు తెంచుకునే ఆవేశాన్ని అదుపులో ఉంచుకున్నట్టు కనిపిస్తోంది. ఇక పౌరుషానికి ప్రతీకలా అరుణ్ కోర మీసం కూడా ఆకట్టుకుంటోంది.

వినాయక చవితి పండుగను పురస్కరించుకుని సరైన పోస్టర్ ను 'ఏనుగు' చిత్ర యూనిట్ విడుదల చేసిందని చెప్పొచ్చు. మాస్, యాక్షన్ డ్రామాగా రూపొందుతోన్న ఈ చిత్రంలో.. హరి గత చిత్రాల తరహాలోనే భారీ యాక్షన్ సీక్వెన్స్ లు ఉండబోతోన్నాయి. డ్రమ్ స్టిక్స్ ప్రొడక్షన్స్ బ్యానర్ పై వెడిక్కారన్ పట్టి ఎస్ శక్తివేల్ ఈ చిత్రాన్ని నిర్మిస్తున్నారు. ఈ చిత్రం కోసం ప్రముఖ నటీనటులు.. స్టార్ టెక్నీషియన్స్ పని చేస్తున్నారు.

''ఏనుగు'' చిత్రంలో ప్రియా భవానీ శంకర్ హీరోయిన్ గా నటిస్తుండగా.. సముద్రఖని - రాధికా శరత్ కుమార్ - 'కేజీయఫ్' రామచంద్రరాజు - యోగిబాబు కీలక పాత్రలు పోషిస్తున్నారు. రాజేశ్ - అమ్ము అభిరామి - బోస్ వెంకట్ - సంజీవ్ - తలైవాసల్ విజయ్ - ఇమాన్ అన్నాచి - ఆడుకలమ్ జయాబాలన్ - గంగై అమరణ్ - ఐశ్వర్య రమా తదితరులు నటిస్తున్నారు. జీవి ప్రకాష్ కుమార్ ఈ చిత్రానికి సంగీతం సమకూరుస్తున్నారు. గోపీనాథ్ సినిమాటోగ్రఫీ అందిస్తోన్న ఈ చిత్రానికి ఆంథోని ఎడిటర్ గా వ్యవహరిస్తున్నారు. ప్రస్తుతం 'ఏనుగు' సినిమా షూటింగ్ శరవేగంగా జరుగుతోంది.