సేతుప‌తి ఈ వింత స‌న్యాసి వేష‌మేంటి?

వ‌రుస ప్ర‌యోగాల‌తో ఉర‌క‌లెత్తిస్తున్నాడు ఆ ట్యాలెంటెడ్ హీరో. ఆ వేషం.. యాస‌.. భాష .. రంగు ప్ర‌తిదీ యూనిక్. ఇండియా లెవ‌ల్లోనే క‌మ‌ల్ హాస‌న్ - అమీర్ ఖాన్- అజిత్- విక్ర‌మ్ లాంటి ప్ర‌యోగాల హీరోల జాబితాలో అత‌డి పేరు కూడా చేరింది. నేటి ట్రెండింగ్ హీరోల్లో అత‌డు చేస్తున్న ప్ర‌యోగాలు అన్నీ ఇన్నీ కావు. ఆయ‌నెవ‌రో ప్ర‌త్యేకించి చెప్పాల్సిన ప‌నేలేదు. పేరు విజ‌య్ సేతుప‌తి. త‌మిళ సినీప‌రిశ్ర‌మ‌లో త‌న‌కంటూ ఓ మార్క్ వేసిన మేటి ప్ర‌తిభావంతుడు.

ఇదివ‌ర‌కూ సీత క‌త్తి సినిమాలో సేనాప‌తి (భార‌తీయుడు) త‌ర‌హా గెట‌ప్ తో మైమ‌రిపించాడు. క‌మ‌ల్ హాస‌న్ ని ఫాలో చేశాడ‌ని అన్నా.. వెండితెర‌పై ఆ గెట‌ప్ లో న‌టించిన తీరుకు త‌మిళ తంబీలు బ్ర‌హ్మ‌ర‌థం ప‌ట్టారు. న‌టిస్తే సేతుప‌తిలా న‌టించాలంటూ కితాబిచ్చారు. అంత‌కుముందు కూడా అదే త‌ర‌హా ప్ర‌యోగాలెన్నో చేశాడు. పిజ్జా లాంటి చిన్న సినిమాల‌తోనే హిట్లు కొట్టి.. ఒక్కో మెట్టు ఎక్కుతూ అగ్ర హీరోగా ఎదిగిన సేతుప‌తి.. అటుపై పూర్తిగా ప్ర‌యోగాల బాట ప‌ట్టాడు. మ‌ణిర‌త్నం మ‌ల్టీస్టార‌ర్ న‌వాబ్ లో ర‌ఫ్ & ఠ‌ఫ్ పోలీసోడిగా నేచుర‌ల్ పెర్ఫామెన్స్ తో మైమ‌రిపించాడు. బ్లాక్ బ‌స్ట‌ర్ 96 లో డిఫ‌రెంట్ పెర్ఫామెన్స్ తో మెప్పించాడు. రీసెంటుగానే `సూప‌ర్ డీల‌క్స్` సినిమాతో మ‌రో బ్లాక్ బ‌స్ట‌ర్ కొట్టి అందులోనూ న‌ట‌న ప‌రంగా విల‌క్ష‌ణ‌త‌ను చాటుకున్నాడు.

అందుకే అత‌డిని ప్ర‌యోగాల హీరోగానే ప‌రిశ్ర‌మ‌లు చూస్తున్నాయి. ప్ర‌యోగాలు చేస్తూ హిట్లు కొట్ట‌డ‌మెలానో ప‌రిశ్ర‌మ‌ల‌కే నేర్పిస్తున్నాడు. ప్ర‌స్తుతం మెగాస్టార్ చిరంజీవి న‌టిస్తున్న `సైరా-న‌ర‌సింహారెడ్డి`లో కీల‌క పాత్ర పోషిస్తున్న సేతుప‌తి ఇప్ప‌టికిప్పుడు అర‌డ‌జ‌ను ప్రాజెక్టుల‌తో బిజీ. సాయిధ‌ర‌మ్ సోద‌రుడు వైష్ణ‌వ్ తేజ్ డెబ్యూ సినిమా `ఉప్పెన‌`లోనూ సేతుప‌తి ఓ కీరోల్ పోషిస్తున్నాడ‌ని తెలుస్తోంది. అలాగే సేతుపతి న‌టించిన తాజా చిత్రం `సింధుబాద్` కొన్ని వివాదాల వ‌ల్ల వాయిదా ప‌డుతూ వ‌స్తోంది. ఇవేగాక‌.. లాభం- సంగ త‌మిఝ‌న్-మామానిథాన్-మార్కోని మాథై- ఇదం పొరులు యావ‌ల్ .. త‌మిళంలోనే ఇన్ని సినిమాల్లో న‌టిస్తున్నాడు.

తాజాగా `క‌డైసి వివాస‌యై` అనే సినిమాలో విజ‌య్ సేతుప‌తి గెట‌ప్ ని చిత్ర‌యూనిట్ రిలీజ్ చేసింది. ఈ పోస్ట‌ర్ ని ప్ర‌ముఖ త‌మిళ క్రిటిక్ ర‌మేష్ బాలా రిలీజ్ చేశారు. తాజా గెట‌ప్ అంతే ఆస‌క్తిని రేకెత్తిస్తోంది. చూడ‌టానికి శివ భ‌క్తి పార‌వ‌శ్యంలో మునిగి తేలే భ‌క్తుడిలాగా క‌నిపిస్తున్నాడు. వైరాగ్యం చెందిన యువ స‌న్యాసిలా క‌నిపిస్తున్నా.. అత‌డి గెట‌ప్ లో ఏదో కొత్త ట్విస్టు క‌నిపిస్తోంది. మెడ‌లో రుద్రాక్ష‌.. చార‌ల చొక్కాయ్ పై పూల చొక్కాయ్.. మాసిన కండువా.. పంచెక‌ట్టు.. కాలికి గాయాలు.. ! అస‌లేంటి ఈ గెట‌ప్? అయినా ఆ చేతికి ఎందుక‌న్ని వాచీలు? కొంప‌దీసి కొట్టుకొచ్చేసిన వాచీలా? ఏమో .. ఇదంతా చూస్తుంటే స‌న్యాసిలా క‌నిపించే సీక్రెట్ దొంగ‌గా న‌టిస్తున్నాడా? అన్న డౌట్లు పుట్టుకొస్తున్నాయ్. మొత్తానికి సేతుప‌తి ట్రెండింగ్ హీరో ఎందుక‌య్యాడో ఇప్ప‌టికైనా అర్థ‌మైందా?