బాలయ్య మొదటి గర్జన వచ్చేది ఈ రోజే...!

నందమూరి నటసింహ బాలకృష్ణ - మాస్ మసాలా డైరెక్టర్ బోయపాటి శ్రీను కాంబినేషన్ లో ఓ మూవీ తెరకెక్కుతున్న విషయం తెలిసిందే. ద్వారక క్రియేషన్స్ బ్యానర్ పై యువ నిర్మాత మిర్యాల రవీందర్ రెడ్డి ఈ చిత్రాన్ని నిర్మిస్తున్నారు. బాలయ్య - బోయపాటి కాంబోలో వస్తున్న హ్యాట్రిక్ సినిమా కావడంతో బాలయ్య అభిమానుల్లో భారీ అంచనాలున్నాయి. గతంలో వీరిద్దరి కాంబినేషన్ లో వచ్చిన 'సింహా' 'లెజెండ్' సినిమాలు సూపర్ హిట్ అయ్యాయి. దీంతో ఈ సినిమాపై బాలయ్యతో పాటు ఆయన అభిమానులు కూడా నమ్మకంతో ఉన్నారు. ఈ సినిమాలో బాలకృష్ణ రెండు విభిన్న పాత్రల్లో కనిపిస్తుండగా.. అందులో ఒకటి అఘోర పాత్ర అని సమాచారం.

ఇదిలా ఉండగా రేపు బాలయ్య పుట్టినరోజు. అంటే ఆయన అభిమానులకు పండుగ రోజు. ఇప్పటికే బాలయ్య పుట్టిన రోజుని పురస్కరించుకుని ఫ్యాన్స్ సోషల్ మీడియా వేదికగా సెలెబ్రేషన్స్ స్టార్ట్ చేసారు. బాలయ్య కామన్ డీపీని ట్రెండ్ చేసేశారు. ఇక ఫ్యాన్స్ సంతోషాన్ని రెట్టింపు చేయడానికి కొన్ని సర్ప్రైజెస్ తో బాలయ్య వస్తున్నారు. బాలయ్య - బోయపాటి మాసివ్ బ్లాక్ బస్టర్ కాంబినేషన్ లో వస్తున్న #BB3 నుండి ఈ రోజు సాయంత్రం 7.09 నిమిషాలకు ఫస్ట్ రోర్ పేరుతో ఒక సర్ప్రైజ్ విడుదల చేయనున్నట్లు అధికారికంగా ప్రకటించారు. దీంతో ఆయన అభిమానులు బాలయ్య మొదటి గర్జన కోసం ఆతృతగా ఎదురు చూస్తున్నారు. ఇప్పటికే ఫస్ట్ షెడ్యూల్ లో ఒక ఫైట్ షూట్ చేశామని ఇటీవల ఒక ఇంటర్వ్యూలో చెప్పుకొచ్చారు. దీంతో రేపు బాలయ్య బర్త్ డే ని పురష్కరించుకొని ఈ రోజు రిలీజ్ చేయబోయే ఫస్ట్ రోర్ ఫైట్ కి సంబంధించిందే అయ్యుంటుందని ఫ్యాన్స్ అనుకుంటున్నారు. అంతేకాకుండా ఈ చిత్రానికి సంగీతం అందిస్తున్న తమన్ కూడా ఇయర్ ఫోన్స్ రెడీ గా పెట్టుకోండి అంటూ ట్వీట్ చేసి వారి ఉత్సాహాన్ని రెట్టింపు చేసాడు. మరి బాలయ్య కోసం బోయపాటి ఎలాంటి గిఫ్ట్ ఇవ్వబోతున్నాడో చూడాలి.

కాగా బాలయ్య తన అభిమానుల కోసం తాను స్వయంగా పాడిన ఒక పాటని కూడా విడుదల చేయనున్నాడు. బాల‌కృష్ణ ఇంత‌కుముందు 'పైసా వ‌సూల్' సినిమా కోసం గొంతు స‌వ‌రించుకొని 'మామా ఏక్ పెగ్ లా' అంటూ ఫ్యాన్స్ ని సర్ప్రైజ్ చేసారు. ఇప్పుడు మళ్ళీ తనదైన శైలిలో పాట పాడి అందర్నీ అలరించనున్నారు. దీనికి సంభందించి వివరాలు తెలియజేస్తూ ''నిన్న త‌ప్పు చేసిన వారిని నిల‌దీసింది ఆ గ‌ళం.. నేడు ఆ బాల గోపాలాన్ని అల‌రించ‌డానికి పాడింది అదే గ‌ళం'' అంటూ అధికారిక పోస్టర్ రిలీజ్ చేశారు. బాలయ్య బర్త్ డే సందర్భంగా విడుదలవుతున్న ఈ సర్ప్రైజెస్ గిఫ్ట్స్ కోసం అభిమానులు ఆసక్తిగా వెయిట్ చేస్తున్నారు.