ఎంఎస్. రాజు '7 డేస్ 6 నైట్స్' ఫస్ట్ లుక్..!

'వాన' 'తూనీగ తూనీగ' వంటి చిత్రాలకు దర్శకత్వం వహించిన సీనియర్‌ ప్రొడ్యూసర్ ఎమ్.ఎస్.రాజు.. చాలా గ్యాప్ తర్వాత 'డ‌ర్టీ హరి' సినిమా కోసం మళ్ళీ మెగా ఫోన్ పట్టారు. నేటి యువతను దృష్టిలో పెట్టుకొని తీసిన ఈ రొమాంటిక్‌ థ్రిల్లర్‌ ఓటీటీ వేదికగా విడుదలై మంచి వ్యూయర్ షిప్ తెచ్చుకుంది. ఈ క్రమంలో ఇప్పుడు ''7 డేస్ 6 నైట్స్'' అనే న్యూ ఏజ్ ఎంటర్టైనర్ తో వస్తున్నారు ఎంఎస్ రాజు. సుమంత్ ఆర్ట్ ప్రొడక్షన్ సమర్పణలో వైల్డ్ హనీ ప్రొడక్షన్స్ బ్యానర్ లో సుమంత్ అశ్విన్ - ఎస్. రజనీకాంత్ సంయుక్తంగా ఈ చిత్రాన్ని నిర్మిస్తున్నారు. వింటేజ్ పిక్చర్స్ & ఎబిజి క్రియేషన్స్ సంస్థలు నిర్మాణ భాగస్వాములుగా ఉన్నాయి

'7 డేస్ 6 నైట్స్' సినిమా ప్రారంభంలో తనయుడిని నిర్మాతగా మాత్రమే ప్రకటించిన ఎం.ఎస్. రాజు.. లేటెస్ట్ గా ఓ పోస్టర్ రిలీజ్ చేసి ఇందులో సమంత్ అశ్విన్ హీరోగా నటిస్తున్నాడనే విషయాన్ని స్పష్టం చేశారు. సుమంత్ అశ్విన్ సరసన మెహర్ చావల్ అనే కొత్తమ్మాయి హీరోయిన్ గా నటిస్తోంది. తాజాగా ఈ జంటకు సంబంధించిన ఫస్ట్ లుక్ ని విడుదల చేశారు. వీరిద్దరితో పాటు రోహన్ - కృతికా శెట్టి అనే మరో జంట కూడా ఈ సినిమాలో కనిపించనున్నారు. సుష్మ - రిషికా బాలి ఇతర కీలక పాత్రలు పోషిస్తుండగా.. 'మిడిల్ క్లాస్ మెలోడీస్' ఫేమ్ గోపరాజు రమణ అతిథి పాత్రలో కనిపించబోతున్నారు. ఈ సినిమాతో సమర్థ్ గొల్లపూడి మ్యూజిక్ డైరెక్టర్ గా పరిచయం అవుతున్నాడు. నాని చమిడిశెట్టి సినిమాటోగ్రఫీ అందిస్తుండగా.. జునైద్ సిద్ధిఖీ ఎడిటింగ్ వర్క్ చేస్తున్నారు.

'డర్టీ హరి' చిత్రానికి పూర్తి భిన్నంగా ''7 డేస్ 6 నైట్స్'' సినిమా ఉంటుందని.. ఆహ్లాదకరమైన వాతావరణంలో ఇంటిల్లిపాదీ చూసే విధంగా ఒక జాలీ ట్రిప్‌ లా ఈ మూవీ ఉండబోతోందని దర్శకుడు చెబుతున్నారు. కథ, స్క్రీన్ ప్లే, డైలాగ్స్, విజువల్స్ మరియు మ్యూజిక్ ఈ చిత్రానికి ప్రధాన ఆకర్షణగా నిలుస్తాయని.. సినిమాలో పాత్రలు మన కళ్ల ముందు కదలాడే సజీవ పాత్రల్లా ఉంటాయని తెలిపారు. ఇప్పటికి 60 శాతం సినిమా పూర్తి చేసుకున్న ఈ చిత్రాన్ని సెప్టెంబర్ రెండో వారంలో రిలీజ్ చేయడానికి మేకర్స్ సన్నాహాలు చేస్తున్నారు.