ఫ్లాప్ హీరోలు.. హిట్టు కొట్టేదెవరో?

ఈ నెల మొత్తం తెలుగులో సినిమాల మోత మోగుతోంది. గత నాలుగు వారాల్లో ఏకంగా 20 సినిమాలకు పైగా రిలీజవ్వడం విశేషం. ఈ వారం కూడా ఒకటికి మూడు సినిమాలు రిలీజవుతున్నాయి. ఈ మూడు సినిమాల హీరోలూ ఇప్పుడు ఫ్లాపుల్లోనే ఉండటం విశేషం. ఈ ముగ్గురికీ హిట్టు ఇప్పుడు చాలా అవసరం. లేకుంటే వాళ్ల మార్కెట్ బాగా దెబ్బ తినేస్తుంది.

ముందుగా గోపీచంద్ సంగతి తీసుకుంటే.. గత ఆరేడేళ్లలో అతడికి దక్కిన ఏకైక హిట్టు ‘లౌక్యం’. దానికి ముందు.. దాని తర్వాత అన్నీ ఫ్లాపులే. చివరగా గోపీచంద్ నటించిన మూడు సినిమాలు.. ‘జిల్’.. ‘సౌఖ్యం’.. ‘గౌతమ్ నంద’ ఫ్లాపులే. ‘ఆరడుగుల బుల్లెట్’ అడ్రస్ లేకుండా పోగా.. ‘ఆక్సిజన్’ కూడా అదే కోవలో చేరేలా కనిపించింది. ఎట్టకేలకు ఎలాగోలా ఈ సినిమాను రిలీజ్ చేస్తున్నారు. గురువారం రిలీజవుతున్న ఈ సినిమాపై అంచనాలు తక్కువే. మరి రిజల్ట్ ఎలా ఉంటుందో చూడాలి.

మరోవైపు ‘బిచ్చగాడు’ సినిమాతో తెలుగులో మంచి మార్కెట్ సంపాదించుకున్న విజయ్ ఆంటోనీ.. ఆ తర్వాత ‘బేతాళుడు’.. ‘యమన్’ సినిమాలతో బోల్తా కొట్టాడు. దీంతో అంతకుముందున్న మార్కెట్ దెబ్బ తింది. ఇప్పుడతను ‘ఇంద్రసేన’తో వస్తున్నాడు. గురువారమే రానున్న ఈ సినిమా ఆడకుంటే అతడి మార్కెట్ పూర్తిగా దెబ్బ తినడం ఖాయం. మరోవైపు ‘తిక్క’.. ‘విన్నర్’.. ‘నక్షత్రం’ సినిమాలతో హ్యాట్రిక్ ఫ్లాపులు తిన్న సాయిధరమ్‌ తేజ్‌ కు ‘జవాన్’ ఆడటం చాలా చాలా ముఖ్యం. ఈ చిత్రం శుక్రవారం రిలీజవుతోంది. మరి ఈ మూడు సినిమాల్లో ఏది ఎలాంటి ఫలితాన్నందుకుంటుందో.. ఏ హీరో కెరీర్ పై ఎలాంటి ప్రభావం చూపుతుందో చూడాలి.