రజినీ సినిమాలో నలుగురు అవార్డ్ విన్నర్లు

సూపర్ స్టార్ రజినీకాంత్ కొత్త సినిమాకు రంగం సిద్ధమైంది. ఈ సినిమాకు నిర్మాత అయిన ధనుష్ నిన్న ఉన్నట్లుండి టైటిల్ లోగో.. ఫస్ట్ లుక్ పోస్టర్లు రిలీజ్ చేసి పెద్ద షాకే ఇచ్చాడు. ‘కబాలి’ ఫేమ్ పా.రంజిత్ దర్శకత్వంలో తెరకెక్కబోయే ఈ సినిమాలో బాలీవుడ్ భామ హ్యూమా ఖురేషి కథానాయికగా నటిస్తున్న సంగతి ఇంతకుముందే వెల్లడైంది. ఇక ఈ సినిమాలో నలుగురు నేషనల్ అవార్డు విన్నర్లు పాలు పంచుకుంటుండటం విశేషం.

ఈ నలుగురిలో ముందుగా చెప్పుకోవాల్సింది తెలుగువాడైన శ్రీకర్ ప్రసాద్ గురించి. ఎడిటర్ గా ఒకటి రెండు కాదు.. స్పెషల్ జ్యూరీ పురస్కారాలతో కలిపి ఏకంగా ఎనిమిది జాతీయ అవార్డులు గెలిచిన ఘనుడు శ్రీకర్ ప్రసాద్. ఇండియాలోని ప్రముఖ భాషలన్నింటిలోనూ సినిమాలకు పని చేశాడు శ్రీకర్. ఆయన రజినీకాంత్ సినిమాకు ఎడిటింగ్ చేయబోతుండటం ఇదే తొలిసారి కావడం విశేషం.

మరోవైపు ‘నా బంగారు తల్లి’ సినిమాతో జాతీయ అవార్డు అందుకున్న అంజలి పాటిల్ ఈ చిత్రంలో ఓ కీలక పాత్ర పోషిస్తోంది. ఆమె ‘కబాలి’లో ధన్సిక చేసిన క్యారెక్టర్ తరహా పాత్ర చేయబోతోందట. ఇక ‘విసారణై’ సినిమాతో జాతీయ ఉత్తమ విలన్ పురస్కారం పొందిన సముద్రఖని ‘కాలా’లో ప్రతినాయకుడి పాత్ర చేయనున్నట్లు సమాచారం. ఇక ‘కాలా’కు నిర్మాత అయిన ధనుష్ సైతం జాతీయ ఉత్తమ నటుడి పురస్కారం అందుకున్న సంగతి తెలిసిందే. ఇలా మొత్తం నలుగురు నేషనల్ అవార్డ్ విన్నర్లు ‘కాలా’కు పని చేస్తున్నారు. ఈ చిత్రానికి సంతోష్ నారాయణన్ సంగీతం అందిస్తున్నాడు.


Like Us on Facebook : https://www.facebook.com/Tupakidotcom/