'గబ్బర్ సింగ్' గ్యాంగ్ మళ్ళీ కలవబోతున్నారా...?

సోషల్ మీడియా వేదికగా దర్శకుడు - సంగీత దర్శకుడికి మధ్య జరిగిన క్యాజువల్ కన్వర్జేషన్ ఒక క్రేజీ ప్రాజెక్ట్ మీద చర్చకు దారి తీసింది. వారు ఎవరో కాదు డైరెక్టర్ హరీష్ శంకర్ - మ్యూజిక్ డైరెక్టర్ దేవిశ్రీ ప్రసాద్. వివరాల్లోకి వెళ్తే పవర్ స్టార్ పవన్ కళ్యాణ్ - డాషింగ్ డైరెక్టర్ హరీష్ శంకర్ కాంబినేషన్లో ఓ సినిమా తెరకెక్కుతున్న సంగతి తెలిసిందే. ఇది పవన్ కళ్యాణ్ కి 28 వ చిత్రం కావడం విశేషం. ఈ సినిమాని మైత్రీ మూవీ మేకర్స్ ఎంతో ప్రతిష్టాత్మకంగా నిర్మిస్తుంది. ఇప్పటికే అఫిసియల్ ప్రకటన ఇవ్వబడిన ఈ సినిమా త్వరలోనే సెట్స్ పైకి వెళ్లనుంది. ప్రస్తుతం లాక్ డౌన్ లో ఇంటికే పరిమితమైన హరీష్ శంకర్ ఈ సినిమా స్క్రిప్ట్ పనుల్లో మునిగిపోయాడు. ఈ నేపథ్యంలో పవన్ కళ్యాణ్ - హరీష్ శంకర్ కాంబినేషన్ లో వచ్చిన 'గబ్బర్ సింగ్' సినిమాలోని 'పిల్లా నువ్వు లేని జీవితం..' అనే సాంగ్ చూస్తూ.. ఆ వీడియో స్క్రీన్ షాట్ ట్విట్టర్ లో షేర్ చేసాడు. దీనికి మ్యూజిక్ డైరెక్టర్ దేవీశ్రీ ని ట్యాగ్ చేస్తూ పవర్ స్టార్ కి తగ్గట్టు మ్యూజిక్ కంపోజ్ చేసినందుకు థ్యాంక్స్ చెప్తూ అప్పటి జ్ఞాపకాలను రీ కలెక్ట్ చేసుకున్నాడు. దీనికి 'దిల్ మాంగే మోర్' అంటూ కామెంట్ జత చేసాడు. దీనికి రిప్లై ఇచ్చిన దేవిశ్రీ 'ఈ ట్వీట్ నేను ఎక్స్పెక్ట్ చేయలేదు సర్ జీ.. గబ్బర్ సింగ్ మ్యాజిక్ మరియు పవర్ ప్యాకెడ్ కాంబోని మర్చిపోలేను.. లవ్ యూ.. దిల్ మాంగే మచ్ మోర్' అంటూ ట్వీట్ చేశాడు. దీంతో వీరి కాంబినేషన్ మళ్ళీ రిపీట్ కానుందంటూ సోషల్ మీడియాలో న్యూస్ స్ప్రెడ్ అయింది.

ఇంతకముందు పవన్ కళ్యాణ్ - హరీష్ శంకర్ - దేవీశ్రీ కలయికలో వచ్చిన 'గబ్బర్ సింగ్' సెన్సేషనల్ హిట్ గా నిలిచింది. ముఖ్యంగా ఈ సినిమాలోనో పాటలు అప్పట్లో ఒక ఊపు ఊపేసాయి. ఇప్పుడు మళ్ళీ వీరు ముగ్గురూ కలవబోతున్నారని టాక్ నడుస్తోంది. ఇదే కనుక నిజమైతే వీరి కాంబోలో మరో మ్యూజికల్ బ్లాక్ బస్టర్ ఖాయమని పవర్ స్టార్ ఫ్యాన్స్ అభిప్రాయపడుతున్నారు. వీరు మళ్ళీ కలవబోతున్నారని అధికారిక ప్రకటన రానప్పటికీ వీరి దిల్ మాంగే మోర్ ట్వీట్స్ చూస్తుంటే నిజమే అనిపిస్తోంది. పవన్ కళ్యాణ్ - హరీష్ శంకర్ కాంబినేషన్ లో ఇది రెండో సినిమా కానుంది. దీనికి సంబంధించిన ప్రకటన వచ్చినప్పటి నుంచే ఈ ప్రాజెక్ట్‌ పై అభిమానుల్లో అంచనాలు పెరిగిపోయాయి. ఈ నేపథ్యంలో ఆ అంచనాలకు ఏ మాత్రం తగ్గకుండా హరీష్‌ జాగ్రత్తలు తీసుకుంటున్నారట. ఈ సినిమాలో పవన్ కళ్యాణ్ ఫుల్ మాస్ రోల్ లో కనిపించనున్నాడట. ఎప్పటి నుండో పవర్ స్టార్ ని ఫుల్ మాస్ క్యారెక్టర్ లో చూడాలనుకుంటున్న ఫ్యాన్స్ ఆకలి ఈ సినిమాతో తీరనున్నదని సమాచారం.