బర్నింగ్ స్టార్ తో గాలి జనార్దన్ సినిమా!

గాలి జనార్దన రెడ్డి.. తెలుగువాడు కాదు కానీ తెలుగువాళ్లు అంత ఈజీగా మరిచిపోయే పేరు కాదిది. అనంతపురంలో గనుల క్వారీలన్నీ గుప్పెట్లో పెట్టుకుని వేల కోట్లు సంపాదించి.. ఉమ్మడి తెలుగు రాష్ట్రంలో రాజకీయాల్ని శాసించిన వ్యక్తి గాలి. కర్ణాటకలో కూడా బాగానే హవా సాగించాడు. కానీ కాలం కలిసిరాక మనోడి సుడి తిరగబడింది. రెండేళ్లకు పైగా జైలు జీవితం అనుభవించి ఈ మధ్యే బెయిలు మీద బయటికొచ్చాడు. ఐతే తెలుగు రాష్ట్రాలతో పూర్తిగా సంబంధాలు తెంచుకోని గాలి.. సినీ పరిశ్రమ ద్వారా మళ్లీ ఇక్కడ కాలుమోపడానికి ప్రయత్నం చేస్తున్నట్లు సమాచారం.

ఈ మధ్య బర్నింగ్ స్టార్ సంపూర్ణేష్ బాబు గాలి జనార్దనరెడ్డి ఇంటికెళ్లి ఆయన్ని కలవడం ఆసక్తి రేపుతోంది. సంపూకి, ఆయనకు ఏం సంబంధం అన్నది తెలియడం లేదు. గాలి ఆతిథ్యానికి ఫ్లాట్ అయిపోయానంటూ ట్విట్టర్ లో మెసేజ్ పెట్టాడు సంపూ. మన బర్నింగ్ బాబు హీరోగా గాలి తెలుగులో ఓ సినిమా నిర్మించే అవకాశాలున్నట్లు గుసగుసలు వినిపిస్తున్నాడు. సంపూతో కాకపోయినా తెలుగులో గాలి ఏదో ఒక సినిమా అయితే నిర్మించడం ఖాయమంటున్నారు. ఈ మధ్య బళ్లారిలో గాలి జనార్దనరెడ్డి అనుచరుడి పుట్టిన రోజు వేడుకలు భారీ స్థాయిలో జరిగాయి. ఈ వేడుకలకు టాలీవుడ్ నుంచి ఓ టీం కూడా వెళ్లింది. వాళ్లకు భారీ ప్యాకేజీ కూడా ఇచ్చాడట గాలి. ఆ సందర్భంగానే తెలుగులో సినిమా తీయడం గురించి చర్చలు కూడా జరిగాయట. కాబట్టి త్వరలోనే గాలి క్రియేషన్స్ సినిమా సెట్స్ మీదికి వెళ్లొచ్చేమో.