ఫస్ట్ లుక్: గేమ్ ఓవర్ అంటున్న తాప్సీ

సొట్ట బుగ్గల సుందరి తాప్సీ రెగ్యులర్ కమర్షియల్ సినిమాలతో పాటుగా డిఫరెంట్ కంటెంట్ ఉండే సినిమాలు చేస్తూ ప్రేక్షకులను ఆకట్టుకుంటోంది. హిందీ సినిమాలు చేస్తూనే మధ్యలో అడపాదడపా తెలుగు సినిమాలు సైన్ చేస్తోంది. తాజాగా తాప్సీ తెలుగు-తమిళ ద్విభాషా చిత్రం 'గేమ్ ఓవర్' ఫస్ట్ లుక్ ను నిర్మాతలు రిలీజ్ చేశారు.

టైటిల్ మాత్రమే కాదు.. ఫస్ట్ లుక్ పోస్టర్ కూడా ఇంట్రెస్టింగ్ గా ఉంది. తాప్సీ తల పట్టుకుని వీల్ చైర్ లో కూర్చొని ఉంది. రెండు కాళ్ళకు కింద భాగంలో పూర్తిగా కట్లు కట్టి ఉన్నాయి. ఇక బ్యాక్ గ్రౌండ్ లో పజిల్ బాక్సుల లాంటి డిజైన్ ఉంది. ఇక టైటిల్ లోగో పై వైర్లెస్ గేమింగ్ కంట్రోలర్ బొమ్మ కూడా ఉంది. ఫస్ట్ లుక్ చూస్తుంటే 'ఆనందో బ్రహ్మ' టైపులో మరో ఇంట్రెస్టింగ్ సినిమాలా అనిపిస్తోంది.

ఈ సినిమాకు దర్శకుడు అశ్విన్ శరవణన్. నిర్మాత ఎస్. శశికాంత్. వై నాట్ స్టూడియోస్ - రిలయన్స్ ఎంటర్టైన్మెంట్స్ వారు కూడా ఈ సినిమా నిర్మాణంలో భాగస్వాములు. పోస్టర్లోనే షూటింగ్ అక్టోబర్ 11 న ప్రారంభం అవుతుందని తెలిపారు.