బాక్సింగ్ రింగ్ లో అడుగుపెట్టిన 'గని'

మెగా ప్రిన్స్‌ వరుణ్‌ తేజ్‌ కథానాయకుడిగా తెరకెక్కుతున్న లేటెస్ట్ స్పోర్ట్స్ డ్రామా ''గని''. బాక్సింగ్ నేపథ్యంలో రూపుదిద్దుకుంటోన్న ఈ చిత్రానికి డెబ్యూ డైరెక్టర్ కిరణ్‌ కొర్రపాటి దర్శకత్వం వహిస్తున్నారు. ఇప్పటికే విడుదలైన ఫస్ట్‌ లుక్‌ పోస్టర్‌ ప్రేక్షకులను అలరించింది. అయితే వరుణ్ ఈ సినిమా షూటింగ్ కొనసాగించడానికి రెడీ అయినట్లు తెలుస్తోంది. ప్రత్యేకంగా ఏర్పాటు చేసిన కస్టమైజ్డ్ సెట్స్ లో హై ఇంటెన్సిటీ బాక్సింగ్ ఎపిసోడ్‌ లను చిత్రీకరించనున్నారు. వరుణ్ తేజ్ మరియు యువ నటుడు నవీన్ చంద్ర పాల్గొంటున్న ఈ బాక్సింగ్ ఎపిసోడ్లను దిలీప్ సుబ్బారాయణ్ పర్యవేక్షిస్తున్నారని సమాచారం.

కాగా, వరుణ్ తేజ్ నటిస్తున్న మొట్టమొదటి స్పోర్ట్స్ డ్రామా 'గని' కోసం బాక్సింగ్ శిక్షణ తీసుకున్నాడని తెలుస్తోంది. ప్రొఫెషనల్ బాక్సర్ గా కనిపించడం కోసం స్పెషల్ డైట్‌ ను పాటిస్తూ కఠోరమైన వర్కౌట్స్ చేస్తున్నాడు. బాలీవుడ్ బ్యూటీ సైఈ మంజ్రేకర్ హీరోయిన్ గా నటిస్తున్న ఈ చిత్రంలో కన్నడ స్టార్ ఉపేంద్ర - బాలీవుడ్ స్టార్ సునీల్ శెట్టి - విలక్షణ నటుడు జగపతిబాబు కీలక పాత్రలు పోషిస్తున్నారు. థమన్ సంగీతం సమకూరుస్తుండగా.. జార్జ్ సి విలియమ్స్ సినిమాటోగ్రఫీ అందిస్తున్నారు. అల్లు అరవింద్‌ సమర్పణలో రెనసాన్స్‌ ఫిలింస్‌ - అల్లు బాబీ పిక్చర్స్ పతాకాలపై అల్లు బాబీ - సిద్ధు ముద్ద కలిసి నిర్మిస్తున్నారు. 'గని' చిత్రాన్ని జులై 30న విడుదల చేయనున్నట్లు మేకర్స్ ప్రకటించారు.