శాతకర్ణి ఆడియో వేడుక.. నభూతో అనేలా

నందమూరి అభిమానులు ఎప్పుడెప్పుడా అని ఎదురు చూస్తున్న వేడుకకు రంగం సిద్ధమైంది. సోమవారం నాడే తిరుపతి వేదికగా ‘గౌతమీపుత్ర శాతకర్ణి’ ఆడియో వేడుక జరగబోతోంది. ఈ వేడుకకు ఏర్పాట్లు భారీగా జరుగుతున్నాయి. ఇప్పటిదాకా తెలుగులో ఏ ఆడియో వేడుకా జరగనంత భారీగా ఈ కార్యక్రమాన్ని చేయడానికి నందమూరి అభిమానులు.. తెలుగుదేశం కార్యకర్తలు తిరుపతిలో ఏర్పాట్లు చేస్తున్నారు. ఇందుకోసం భారీ మైదానాన్ని సిద్ధం చేస్తున్నారు.

ఈ వేడుకకు అభిమానులు లక్షమందికి పైనే వస్తారని అంచనా వేస్తున్నారు. ఎంత మంది వచ్చినా ఇబ్బంది లేకుండా మైదానాన్ని రెడీ చేస్తున్నారు. భద్రత ఏర్పాట్లకూ ఢోకా లేకుండా చూసుకుంటున్నారు. భారీ కటౌట్లు.. భారీ తెరలు ఏర్పాటు చేస్తున్నారు. ఈ వేడుకను తెలుగుదేశం పార్టీ వర్గాలు కూడా ప్రతిష్టాత్మకంగా తీసుకున్నాయి. పార్టీ బహిరంగ సభ తరహాలో దీన్ని విజయవంతం చేయడానికి కంకణం కట్టుకుని పని చేస్తున్నారు.

ఈ వేడకకు ఆంధ్రప్రదేశ్ ముఖ్యమంత్రి నారా చంద్రబాబు నాయుడు.. కేంద్ర మంత్రి వెంకయ్య నాయుడుతో పాటు సినీ.. రాజకీయ ప్రముఖులు పెద్ద ఎత్తున హాజరు కాబోతున్నారు. మరోవైపు ఈ వేడుకకు ముందు తిరుపతితో బాలయ్య అభిమానులతో కలిసి భారీ ర్యాలీ నిర్వహించబోతున్నారు. ఓపెన్ టాప్ జీపులో ఆయన అభిమానులకు అభివాదం చేస్తూ వేదిక వద్దకు చేరుకుంటారట. మార్గ మధ్యంలో ఆయన గుర్రపు స్వారీ కూడా చేస్తారని సమాచారం.

Like Us on Facebook : https://www.facebook.com/Tupakidotcom/