లోకనాయకుడి కోసం స్క్రిప్ట్ రెడీ చేసిన స్టార్ డైరెక్టర్...?

గౌతమ్ వాసుదేవ్ మీనన్.. సౌత్ సినీ ఇండస్ట్రీలో స్టార్ డైరెక్టర్లలో ఒకరుగా కొనసాగుతున్నారు. లవ్ స్టోరీస్ తో పాటు యాక్షన్ సినిమాలను కూడా తన స్టైల్ లో అద్భుతంగా తెరకెక్కించగలడని గౌతమ్ మీనన్ కి పేరుంది. వైవిధ్యమైన చిత్రాలతో అటు కోలీవుడ్ తో పాటు ఇటు టాలీవుడ్ లో తనకంటూ ప్రత్యేకమైన ఇమేజ్ క్రియేట్ చేసుకున్నాడు. 'ఏమాయ చేసావే' 'ఘర్షణ' 'రాఘవన్' 'సాహసం శ్వాసగా సాగిపో' 'సూర్య సన్నాఫ్ కృష్ణన్' 'ఎటో వెళ్లిపోయింది మనసు' 'ఎంతవాడు గానీ' చిత్రాలతో తెలుగులో కూడా మంచి మార్కెట్ క్రియేట్ చేసుకున్నాడు. సెన్సిబుల్ స్టోరీని తనదైన శైలిలో యాక్షన్ జోడించి ప్రేక్షకులను మెప్పించడంలో గౌతమ్ మీనన్ సిద్ధహస్తుడని ప్రేక్షకులు ఆయన సినిమాలపై ఆసక్తి కనబరుస్తుంటారు. అయితే ఈ మధ్య సినిమాలకు కొంచెం గ్యాప్ ఇచ్చిన గౌతమ్ మీనన్ 'క్వీన్' అనే వెబ్ సిరీస్ రమ్యకృష్ణతో తీసి అలరించాడు. అంతేకాకుండా 'కనులు కనులను దోచాయంటే' సినిమాలో కీలక పాత్రలో నటించి తనలోని మరో కోణాన్ని ప్రేక్షకులకు పరిచయం చేసాడు.

కాగా గౌతమ్ మీనన్ - లోకనాయకుడు కమల్ హాసన్ కాంబినేషన్ లో వచ్చిన యాక్షన్ థ్రిల్లర్ 'వెట్టియాడు విలైయాడు'. ఈ సినిమా తెలుగులో 2006లో 'రాఘవన్' పేరుతో విడుదలైంది. జ్యోతిక, కమలినీ ముఖర్జీ, ప్రకాష్ రాజ్ ప్రధాన పాత్రల్లో తెరకెక్కిన ఈ మూవీ తెలుగులో కూడా మంచి విజయాన్ని నమోదు చేసుకుంది. ఈ సినిమాకు సీక్వెల్ చేయనున్నారని ఎప్పటి నుండో వార్తలు వస్తున్నాయి. ఈ నేపథ్యంలో యాక్షన్ అండ్ క్రైమ్ థ్రిల్లర్ సీక్వెల్ 'రాఘవన్ 2' కి గౌతమ్ మీనన్ ఇప్పటికే స్క్రిప్ట్ సిద్ధం చేశారట. ఇప్పటికే ఈ స్టోరీ లైన్ కి కమల్ హాసన్ ఓకే చెప్పాడని.. ఒక్కసారి పూర్తి స్క్రిప్ట్ ఓకే చేస్తే ఈ ప్రాజెక్ట్ పట్టాలెక్కనుందని సమాచారం. ఈ క్రేజీ ప్రాజెక్ట్ లో హీరోయిన్ గా స్టార్ హీరోయిన్ అనుష్క శెట్టి నటించే అవకాశం ఉందట. ప్రస్తుతం కమల్ హాసన్ స్టార్ డైరెక్టర్ శంకర్ దర్శకత్వంలో 'భారతీయుడు 2'లో నటిస్తున్నాడు. ఈ సినిమాలో హీరో సిద్ధార్థ్, కాజల్ అగర్వాల్, రకుల్ ప్రీత్ సింగ్ కీలక పాత్రల్లో నటిస్తున్నారు.