'బాహుబలి' సాంగ్ కి స్టెప్పులేసి దుమ్ములేపిన హా హా హాసిని...!

జెనీలియా డిసౌజా.. ఒకప్పుడు సౌత్ సినీ ఇండస్ట్రీలో ఓ వెలుగు వెలిగిన స్టార్ హీరోయిన్. పెళ్లి తర్వాత సినిమాలకు విరామం తీసుకున్న ఈ బ్యూటీ సోషల్ మీడియాలో మాత్రం యాక్టీవ్ గా ఉంటోంది. తన భర్త రితేశ్ తో కలిసి చేసే ఫన్నీ వీడీయోస్ ని షేర్ చేసుకుంటూ వస్తోంది. ఈ క్రమంలో తాజాగా జెనీలియా చాలా రోజుల తర్వాత స్టెప్పులేసింది. 'బాహుబలి - ది బిగినింగ్' చిత్రంలోని 'మనోహరి' సాంగ్ కి డ్యాన్స్ చేసి అదరహో అనిపించింది మన హా హా హాసిని. 'బాహుబలి' సినిమాలో 'మనోహరి' సాంగ్ ఎంతగా హిట్ అయిందో అందరికి తెలిసిందే. ఈ సాంగ్ కి బాలీవుడ్ స్టార్స్ సైతం టిక్ టాక్ వీడియోలు చేసి అలరించారు. ఇప్పుడు జెనీలియా ఈ సాంగ్ కోసం విశాలమైన ప్రదేశంలో ఉన్న మెత్తటి మట్టిలో కాలు కదుపుతూ గాల్లోకి ఎగురుతూ స్టెప్పులేసి దుమ్ములేపింది. ఈ వీడియో ఇంస్టాగ్రామ్ లో షేర్ చేసిన జెనీలియా ‘హ్యాపీగా ఉన్నపుడు డ్యాన్స్ చేయండి’ అంటూ క్యాప్షన్ పెట్టింది. ఇన్నాళ్లు లాక్ డౌన్ వలన ఇంటికే పరిమితమైన జెనీలియా ఇప్పుడు నిబంధనలు సడలించడంతో బయటకి వచ్చి ఎంజాయ్ చేస్తున్నట్లుంది. ఈ వీడియో ఇప్పుడు సోషల్ మీడియాలో వైరల్ అయింది.

కాగా జెనీలియా 'నువ్వేకావాలి' చిత్రాన్ని హిందీ రీమేక్ 'తుజే మేరీ కసమ్' సినిమాతో కెరీర్ స్టార్ట్ చేసింది. స్టార్ హీరోల సరసన నటించి పలు విజయవంతమైన చిత్రాలు తన ఖాతాలో వేసుకుంది. తెలుగుతో పాటు హిందీ తమిళ్ చిత్రాల్లో అల్లరి పిల్లగా.. క్యూట్ హీరోయిన్ గా నటించింది. 'బొమ్మ‌రిల్లు' సినిమాతో హ‌హ హాసిని అంటూ తెలుగు ప్రేక్షకులకు బాగా దగ్గరైపోయింది. ఇక 'సత్యం' 'సాంబ‌' 'ఆరెంజ్' 'సై' 'ఢీ' 'రెడీ' వంటి చాలా సినిమాలతో మంచి గుర్తింపు తెచ్చుకుంది. తన తొలి సినిమా హీరో రితేష్ దేశ్‌ముఖ్‌ ను 2012లో వివాహమాడి సినిమాలకు గుడ్ బై చెప్పేసింది ఈ ముద్దుగుమ్మ. ఆమె చివరగా తెలుగులో చేసిన సినిమా 'నా ఇష్టం'. 11 ఏళ్ళ సినీ ప్రయాణంలో బాలీవుడ్ నుండి టాలీవుడ్ వరకు ఎన్నో చిత్రాల్లో నటించిన జెనీలియా మళ్ళీ సినిమాల్లోకి రీఎంట్రీ ఇస్తోందని చాలా రోజులుగా వార్తలు వస్తూనే ఉన్నాయి. కానీ ఇంత వరకు ఆమె ఏ చిత్రంలోనూ నటించలేదు. కాకపోతే త్వరలోనే సినిమాల్లోకి రీఎంట్రీ ఇస్తానని చెప్పుకొచ్చింది జెన్నీ.