నెట్టింట వైరల్ అవుతున్న రామ్ - జెన్నీ ఇంస్టా వీడియో..!!

సోషల్ మీడియాలో హీరోయిన్ జెనిలియా సందడి రోజురోజుకి పెరుగుతోంది. రోజు సోషల్ మీడియాలో పోస్టులతో హల్చల్ చేస్తోంది. తాజాగా మరోసారి జెన్నీ.. 2008లోకి వెళ్లిపోయింది. ఎందుకంటే ఆమె బెస్ట్ ఫ్రెండ్ హీరో రామ్ ఆమెను ముంబై వెళ్లి కలిసాడు. ఇటీవల జెనీలియా ఓ ఇంస్టా రీల్ చేస్తూ గాయపడిన సంగతి తెలిసిందే. ఆ వీడియో చేసే సమయంలో కిందపడి తన చేతికి గాయం చేసుకోవడంతో ఆమె చేతికి పట్టి కట్టారు డాక్టర్స్. అయితే హీరో రామ్ ఇటీవలే జెన్నీని కలవడానికి వాళ్ళింటికి వెళ్లాడు. ముంబైకి ఏ పనిమీద వెళ్ళాడో తెలియదు కానీ తన ఫ్రెండ్ జెన్నీని మాత్రం వెళ్లిన ప్రతిసారి వీలైనప్పుడల్లా కలుస్తుంటాడు రామ్. వీరిద్దరూ 2008లో రెడీ అనే సినిమాలో జంటగా నటించారు.

ఆ సినిమా సూపర్ హిట్ అవ్వడమే కాకుండా అవార్డులు కూడా అందుకుంది. అప్పటినుండి వీరిద్దరూ మంచి స్నేహితులు అయిపోయారు. ఎప్పటికప్పుడు ఇద్దరూ మంచిచెడులు మాట్లాడుకుంటారు. రామ్ ఇంటికి వెళ్లడంతో జెన్నీ సందడి మాములుగా లేదు. ఇంస్టాగ్రామ్ ఓపెన్ చేసి రామ్ తో రీల్ చేసే ప్రయత్నం చేసింది. అదికూడా రెడీ సినిమాలోని 'అయ్యో అయ్యో దానయ్య' పాటకు ఇద్దరూ డ్యూయెట్ రీల్ చేయబోయారు. కానీ పాట మధ్యలో మళ్లీ జెన్నీ.. మరోసారి కిందపడబోయింది. వెంటనే రామ్ పట్టుకొని పాట లిరిక్స్ మర్చిపోయాడు. సిగ్గుపడుతూ నవ్వడం మొదలుపెట్టాడు. ఇద్దరూ వీడియోలో జీన్స్ ధరించి స్టైల్ గా కనిపించారు. అయితే ఆ ఫన్నీ వీడియోను జెనీలియా తన ఇంస్టాలో పోస్ట్ చేసింది. 'అయ్యో అయ్యో.. ఫస్ట్ రామ్ రీల్ చేస్తున్నాడు. బాబుగారు సిగ్గు పడుతున్నాడు' అంటూ కాప్షన్ జోడించింది. ప్రస్తుతం ఈ వీడియో సోషల్ మీడియాలో వైరల్ అవుతోంది.