'జెంటిల్ మ్యాన్ 2' దర్శకుడు ఖరారు..!

అగ్ర దర్శకుడు శంకర్ తెరకెక్కించిన ‘జెంటిల్ మ్యాన్’ సినిమా ఎంతటి సంచలనం సృష్టించిందో ప్రత్యేకంగా చెప్పనక్కర్లేదు. సీనియర్ ప్రొడ్యూసర్ కెటి కుంజుమోన్ ఈ చిత్రాన్ని నిర్మించారు. దాదాపు ముప్పై ఏళ్ల తర్వాత ఈ సినిమాకు సీక్వెల్ గా ''జెంటిల్ మ్యాన్ 2'' రూపొందించనున్నట్లు నిర్మాత ప్రకటించారు.

'జెంటిల్ మ్యాన్ 2' చిత్రానికి సంబంధించి ఒక్కొక్కటిగా అప్డేట్ వదులుతూ ప్రేక్షకుల్లో ఆసక్తిని కలిగిస్తున్నారు నిర్మాత కుంజుమోన్. ఇందులో ఫస్ట్ హీరోయిన్ గా మలయాళ ముద్దుగుమ్మ నయనతార చక్రవర్తిని ఫైనలైజ్ చేయగా.. సెకండ్ హీరోయిన్ గా ప్రియాలాల్ ను ఎంపిక చేసారు.

అలానే మ్యూజిక్ డైరెక్టర్ గా ఎంఎం కీరవాణి ని ఈ ప్రాజెక్ట్ లోకి తీసుకున్నారు. అయితే 'జెంటిల్ మెన్ 2' సినిమాలో హీరో ఎవరు? డైరెక్టర్ ఎవరు? అనే విషయాలను నిర్మాత వెల్లడించలేదు. ఈ నేపథ్యంలో తాజాగా ఈ సినిమా దర్శకుడిని అధికారికంగా ప్రకటించారు.

'జెంటిల్ మ్యాన్ 2' మూవీకి ఎ.గోకుల్ కృష్ణ దర్శకత్వం వహిస్తారని ట్విట్టర్ వేదికగా అనౌన్స్ చేశారు. 'సర్వం' సినిమాతో డైరెక్టర్ గా పరిచయమైన గోకుల్.. నాని తో 'ఆహా కల్యాణం' అనే ద్విభాషా చిత్రాన్ని తెరకెక్కించారు. ఇప్పుడు బ్లాక్ బస్టర్ కు సీక్వెల్ ని రూపొందించడానికి రెడీ అయ్యారు.

జెంటిల్ మెన్ ఫిల్మ్ ఇంటర్నేషనల్ బ్యానర్ పై ''జెంటిల్ మ్యాన్ 2'' సినిమా తెరకెక్కనుంది. పాన్ ఇండియా స్థాయిలో అన్ని ప్రధాన భారతీయ భాషల్లో ఈ మూవీ రూపొందునుంది.

నిర్మాత కెటి కుంజుమోన్ రెండు దశాబ్దాల తర్వాత ఈ మెగా ప్రాజెక్ట్ తో మళ్ళీ నిర్మాణ రంగంలోకి రీఎంట్రీ ఇస్తున్నారు. త్వరలోనే ఈ సినిమాలో నటించే హీరోని ప్రకటించే అవకాశాలు ఉన్నాయి.