అర డజన్ లో జెంటిల్మన్.. నిలబడతాడా?

ఈ ఏడాది సమ్మర్ లో భారీ చిత్రాల రిలీజ్ లు ఉండడంతో.. షెడ్యూల్ ఖాళీ లేక చాలా వరకూ చిన్నా చితకా సినిమాలు ఆగిపోయాయి. ఇప్పుడు సమ్మర్ హాలీడేస్ ముగిసిపోవడం.. పెద్ద సినిమాల ఫ్లో ఆగిపోవడంతో.. ఇక బాక్సాఫీస్ దగ్గర బరిలో దిగేందుకు లో బడ్జెట్ సినిమాలు క్యూ కట్టేస్తున్నాయి. ఈ శుక్రవారం అయితే.. ఏకంగా అరడజన్ సినిమాలు థియేటర్లలోకి వస్తుండడం విశేషం.

ఇంద్రగంటి మోహన్ కృష్ణ దర్శకత్వంలో నేచురల్ స్టార్ నాని నటించిన 'జెంటిల్మన్'.. జూన్ 17న విడుదల అవుతున్న సినిమాల్లో ముఖ్యమైనది. తన కెరీర్ లోనే బెస్ట్ స్టేజ్ లో ఉన్న నాని.. ఈ చిత్రంపై చాలానే అంచనాలను పెట్టుకున్నాడు. ఈ మూవీతో హ్యాట్రిక్ కొట్టాలనే కసితో ఉన్నాడు నాని. భలేభలే మగాడివోయ్ బ్లాక్ బస్టర్ - కృష్ణగాడి వీర ప్రేమగాధ హిట్ ల తర్వాత.. నాని నుంచి వస్తున్న సినిమా ఇదే. పైగా అష్టాచెమ్మా కాంబినేషన్ కావడంతో.. ఆడియన్స్ లో కూడా చాలానే ఇంట్రెస్ట్ ఉంది. జెంటిల్మన్ కాకుండా.. మరో ఐదు సినిమాలు అదృష్టాన్ని పరీక్షించుకుంటున్నాయి.

మీకు మీరే మాకు మేమే - గుప్పెడంత ప్రేమ - కంట్రోల్ సి - ప్రేమికుడు - రుద్ర ఐపీఎస్ చిత్రాలు కూడా ఈ శుక్రవారమే విడుదలవుతున్నాయి. అయితే.. జెంటిల్మన్ మినహాయిస్తే.. మిగతావాటిపై అంతగా హైప్ లేని మాట వాస్తవమే. ఇప్పటికీ బాక్సాఫీస్ దగ్గర సత్తా చాటుతున్న అ..ఆ.. - సుప్రీమ్ - సరైనోడులకు నాని నుంచి గట్టి పోటీ ఎదురయ్యే ఛాన్స్ ఉందని ఇండస్ట్రీ జనాలు అంటున్నారు.